Ձեր վստահելի աղբյուրը

Առավոտյան ժամը 7-ից «Անկախ դիտորդ» դիտորդական առաքելությունը 170 հոգանոց կազմով հետևում է Երևանում ընթացող ավագանու ընտրություններին․ արդեն կան արձանագրված մի շարք խնդիրներ: Lրագրողների հետ զրույցում ասաց «Անկախ դիտորդ» հասարակական դաշինքի ներկայացուցիչ Դանիել Իոաննիսյանը՝  ներկայացնելով դիտարկման միջանկյալ արդյունքները:

Մասնավորապես, ըստ նրա, 4 ընտրատեղամասերում պրոցեսը սկսվել է 20 րոպե ուշացումով, 2/21 տեղամասում այն սկսվել է ավելի քան մեկ ժամ ուշացումով՝ պայմանավորված հանձնաժողովի նախագահի բացակայությամբ: Բացի այդ, ինչպես նշեց Իոաննիսյանը, շատ տեղամասեր խիստ անհարմար տեղերում են և անմատչելի, 4-ը նույնիսկ նկուղային հարկերում են:

«Ընդհանուր առմամբ, արձանագրվել է 48 խախտում, որոնցից 4-ը՝ հանձնաժողովի նախագահի, 21-ը՝ վստահված անձանց, 21-ը՝ ընտրողների, մնացածը՝ անհայտ անձանց կողմից: Հիմնականում խախտումները եղել են ՔՊ-ի, բայց նաև եղել են մեկից ավելի խախտում՝ արձանագրված «Ապրելու երկիր», «Ազգային առաջընթաց», «Հանրային ձայն», «Ուժը հայրենյաց», «Հանրապետություն» և «Մայր Հայաստան» քաղաքական ուժերի կողմից։

7 տեղամասային ընտրական հանձնաժողովներում մեր դիտորդները արձանագրել են ուղղորդում, որոնցից 4-ը՝ 6/13, 9/56, 9/57 և 9/6 տեղամասերում։ Դրանք պարբերաբար կրկնվել են և եղել են ՔՊ-ի ներկայացուցիչների կողմից: Մյուս դեպքերը եղել են «Ապրելու երկիր», «Լուսավոր Հայաստան» կուսակցությունների կողմից»,- նշեց նա՝ հավելելով, որ 18 ընտրատեղամասում նկատել են կուտակումներ, որոնցից 4-ը կրել են պարբերական բնույթ:

Նրա խոսքով՝ մեկ ընտրական տեղամասում, որը գտնվում է Աջափնյակ համայքնում, «Հանրային ձայն» կուսակցության 3 ներկայացուցչի մուտք է արձանագրվել տեղամաս, ինչն արգելված է:

Միաժամանակ նշվեց, որ 20 ընտրական տեղամասերում ընտրության գաղտնիության խախտման հետ կապված դեպքեր են արձանագրվել, որոնց մի մասը պայմանավորված է եղել սխալ կահավորմամբ, 30 դեպքով էլ արձանագրվել է ընթացակարգային խախտումներ։

Դանիել Իոաննիսյանն ասաց, որ ԿԸՀ-ի կայքի հասանելիության հետ կապված լուրջ խնդիրներ կան, այն կամ սահմանափակված է, կամ ինչ-որ տեխնիկական խնդիրների պատճառով հնարավոր չի լինում կայքին հետևել։

«Ժամը 07.56-ի և 08.01-ի միջակայքում վիդեոդիտարկման հնարավորությունները խիստ սահմանափակվել են, այնպես է արվել, որ մեկ IP-ից հնարավոր լինի միայն մեկ կամերայի հետևել: Դա նշանակում է, որ եթե մեկ պրովայդեր մեկ IP-ով ինտերնետ է տալիս մի ամբողջ շենքի, ապա եթե շենքից մեկը հետևում է մի տեղամասի, այդ շենքից ուրիշ մարդ չի կարող այլ տեղամասի ընթացքին հետևել»,- ընդգծեց նա՝ հավելելով, որ խնդիրը հիմա կարգավորվել է։ 

Դանիել Իոաննիսյանը նաև հայտնեց, որ շատ տեղերում տեսնում են, այսպես կոչված, ձայնային ձեռներեցների, որը հայտնի է «տասովշիկ» անունով, որոնք ընտրողներին ուղեկցում են, ուղղորդում են:

«Բայց կա որոշակի որակական տարբերություն։ Երբ ընտրողների վրա ապօրինի ազդեցության գործիքներ են գործադրվում, մենք տեսնում ենք առավոտյան ժամերին բարձր մասնակցություն, այս անգամ դա եղել է հատուկենտ տեղամասերում: Այսինքն՝ զանգվածային կերպով առավոտյան ժամերին բարձր մասնակցություն չի եղել: Ինչ-որ առումով դա նորմալ է, քանի որ մարդիկ կիրակի առավոտյան ուզում են քնել, և տասովշիկները նրանց քնից չեն հանում ու տանում տեղամասեր: Դա երևույթ էր, որ տարիներ առաջ տեսնում էինք, այսօր դա բացառություն է։ Բայց շատ տեղերում տեսնում ենք ձայնային ձեռներեցների ակտիվություն, ընտրողներին զանգել, կանչել և այլն: Հիմնականում ՔՊ-ի դեպքում այդ երևույթը զանգվածային բնույթ է կրում: Տեղ կա, որտեղ մենք նկատել ենք քրեական հեղինակությունների շրջանակից մարդիկ, որոնք համակարգում են այդ աշխատանքը»,- ընդգծեց նա։

Նշենք, որ «Անկախ դիտորդ» դիտորդական առաքելության միջանկյալ դիտարկումների համաձայն՝ 9/56-9/57 տեղամասերում ՔՊ վստահված անձը, նրա հայրը, շինության պահակը և անհայտ անձինք ցուցակագրել են ընտրողներին, ուղղորդել նրանց, ովքեր եկել էին քվեարկության, զանգել են նրանց, ովքեր դեռևս չէին եկել։

Դիտորդների կողմից բացահայտվելուց հետո նրանք փորձել են ներկայացնել, թե իբր աշխատում են ոչ թե ՔՊ-ի օգտին, այլ մեկ այլ կուսակցության, թեև մինչ այդ դիտորդներն արձանագրել էին, որ նշված անձինք հիշեցնում էին ընտրողներին, որ պիտի քվեարկեն 2-րդ համարի օգտին։
4/45-ում դիտորդները նաև արձանագրել են, որ հանձնաժողովի նախագահը կապի մեջ է ՔՊ շտաբի հետ, հաղորդակցվում է վստահված անձանց և ընտրողների հետ։

 «Անկախ դիտորդ» դիտորդական առաքելության միջանկյալ արդյունքներն՝ այստեղ։