Ձեր վստահելի աղբյուրը

Ընտրական օրենսգրքի համաձայն, ընտրական իրավունք ունեն տվյալ համայնքում 6 ամսվա հաշվառում ունեցող ՀՀ քաղաքացիները, մինչև քվեարկության օրը տվյալ համայնքում առնվազն 1 տարվա հաշվառում ունեցող ՀՀ քաղաքացիություն չունեցող անձինք՝  օտարերկրացիների բոլոր կատեգորիաները՝ տարբեր հիմքերով կացության կարգավիճակներ ունեցող օտարերկրացիներ, փախստականի կարգավիճակ ունեցող անձինք։ Ասուլիսում հայտարարեց ՀՀ ՆԳՆ միգրացիայի և քաղաքացիության ծառայության պետ Արմեն Ղազարյանը։

Նա նշեց, որ Երևան համայնքի 824 հազար 250  ընտրողից 14 հազար 653-ը ոչ ՀՀ քաղաքացիներ են։ Ա. Ղազարյանը հայտարարեց, որ Երևանի ավագանու այս ընտրություններին ընտրական իրավունք ունի Հնդկաստանի 89 քաղաքացի, 11 հազար 890 ՌԴ քաղաքացի։ Կան նաև այլ երկրների քաղաքացիներ։

Համեմատության համար նշեց, որ 2018 թ. Երևանի ավագանու ընտություններին 840 602  անձ ընտրելու իրավունք ուներ, որից 7741-ը եղել են ոչ ՀՀ քաղաքացիներ։

Ա. Ղազարյանը նաև հայտնեց, որ ստուգումներով ընտրացուցակներում 381 անճշտություն է հայտնաբերվել, որոնցից 225 դեպքում մահացած անձանց տվյալներ են եղել գրանցված։

«Մահացած անձանց տվյալները ի՞նչ կերպով են մնում ընտրացուցակներ. հիմնականում եթե ՀՀ քաղաքացին մահանում է ՀՀ տարածքից դուրս, աճյունի  տեղափոխումից հետո անհրաժեշտ է որպեսզի այստեղ հարազատները մահվան վկայական ստանան։ Այդ դեպքում նմանատիպ անճշտություննե չեն լինի»,- մանրամասնեց Ղազարանը։