Ձեր վստահելի աղբյուրը

ՀՀ ՆԳՆ միգրացիայի և քաղաքացիության ծառայության պետ Արմեն Ղազարյանն ասուլիսում անդրադարձավ կոնկրետ հասցեներում մեծաթիվ անձանց հաշվառման առկայության փաստի մասին, որի վերաբերյալ վերջին օրերին հաճախ է բարձրաձայնվում։ 

«Բնակչության պետական ռեգիստրի մասին օրենքով և կառավարության համապատասխան որոշումներով, հաշվառումը որևէ հասցեում իրականացվում է կամ սեփականատիրոջ համաձայնությամբ, կամ ոստիկանության կողմից ստուգման իրականացման արդյունքում։
Անձը  դիմում է ներկայացնում, ցանկանում է  հաշվառվել որևէ հասցեում, դրա համար անհրաժեշտ  պայմանը կամ սեփականատիրոջ համաձայանությունն է կամ  փաստացի հաշվառման պարագայում ոստիկանության աշխատակցի կողմից տրվող համապատասխան տեղեկանքը։  

Որևէ օրենսդրական սահմանափակում չկա, թե կոնկրետ  հասցեի վրա որքան անձ կարող է հաշվառված լինել»,- մանրամասնեց Ա. Ղազարյանը։

Նա կրկնեց՝ հաշվառման պայմանները երկուսն են. «Եթե առկա է սեփականատիրոջ համաձայնությունը, միգրացիայի և քաղաքացիության ծառայությունը որևէ իրավական հիմք չունի  անձին տվյալ հասցեում չհաշվառելու համար։ Երկրորդ հանգամանքը՝  փաստացի հաշվառման պարագայում ոստիկանության  աշխատակցի կողմից տրամադրվող տեղեկանքն է։ Եթե այս երկու պայմաններից որևէ մեկը բավարարվում է, հաշվառումը պետք է իրականացվի։ Սեփականատերը դիմումի  համաձայն կարող է անձին հաշվառումից հանել իր սեփականությունից։ Այս պարագայում էլ չկա  պարտադիր պահանջ, հաշվառումից հանվող անձին  հարցում անել կամ նրա կարծիքը հաշվի առնել։ Սեփականատիրոջ իրավունքն է  իր սեփականությունը հանդիսացող հասցեից հանել անձին հաշվառումից»։