Ձեր վստահելի աղբյուրը

«Բնակչության մոտ կա ապատիա՝ ընդհանուր, քաղաքական, արտաքին քաղաքականության իրավիճակից, որի մասին ես հաճախ խոսում եմ»,-ընտրատեղամասի դիմաց տված հարցազրույցում հայտարարեց Հայկ Մարությանը:

Նա հայտնեց, որ գործող իշխանությունները գողացել են մարդկանց հույսը և  ինքն այսօր քվեարկել է ժողովրդի հույսը հետ բերելու օգտին:

Մարությանն անդրադարձավ նաև Փաշինյանի հայտարարությանը, թե ինքը իշխանություններին հարվածել է թիկունքից:

«Թիկունքից հարվածելը կլիներ այն, եթե ես միաժամանակ դուրս գայի թե՛ պաշտոնից, թե՛ կուսակցությունից և հայտարարեի դրա մասին բոլորին: Այնինչ ես ներքին կարգով միայն մեկ հոգու՝ Սուրեն Պապիկյանին հայտնել եմ, որ այլևս մեր ճանապարհները չեն կարող լինել իրար հետ և այն ուղղակի սկզբունքային խնդիրների համար է»,-ասաց Մարությանը և, տեղեկացնելով, որ այդ մասին հայտարարելու իրավունքը թողել է ՔՊ-ին, հավելեց. «Ունենալով շատ լուրջ սկզբունքային տարաձայնություններ ՔՊ կուսակցության վերնախավի հետ՝ ես այդ քայլին դիմել եմ միայն նրա համար, որպեսզի ապահովեմ իրենց անվտանգությունը»:

Նա հայտնեց, որ չի մասնակցել հանրայինի բանավեճին, քանի որ Պետրոս Ղազարյանն անցել էր բոլոր կարմիր գծերը, և բոլորը գիտեին, որ նա իշխանական պրոպագանդիստ է:

«Կարմիր գծերն անցավ այն պահից, երբ սկսվեց թեկանծուներից մեկին՝ ինձ որակումներ տալ, պիտակավորումներ կպցնել եթերում, ընդ որում՝ եթերը կապված էր արտաքին քաղաքականության հետ»,-ասաց Մարությանը և նկատեց, որ բանավեճից հետո Հանրային Հեռուստաընկերությունը մեկ ժամանոց ծավալուն հարցազրույց է կազմակերպում իշխանական թեկանծուի հետ, ինչն անհավասար պայմաներ է ստեղծում մյուս թեկանծուների համար:

«Անհավասար մրցակցության ապոգեյա է տեղի ունեցել»,-եզրափակեց Մարությանը: