Ձեր վստահելի աղբյուրը

«Մեր թիմը հիմա վերլուծում է այն պատճառները, որոնք նպաստեցին ընտրություններին մասնակցության ցածր տոկոսին»,-լրագրողների հետ հանդիպմանն ասաց «Մայր Հայաստան» դաշինքի ընտրական ցուցակը գլխավորող Անդրանիկ Թևանյանը։

Նա շնորհակալություն հայտնեց ընտրատեղամասեր գնացած քաղաքացիներին քաղաքացիական դիրքորոշումն արտահայտելու համար, ինչի  շնորհիվ «առաջին լուրջ հարվածն է հասցվել իշխանությանը»։

«Ի հակառակ այն հայտարարությունների, թե ընտրություններին մասնակցելը սխալ է, լեգիտիմացնում է իշխանության հաղթանակը, մենք լեգիտիմացրեցինք նրանց պարտությունը։ Այս առումով, սա առաջին քայլն է, «Մայր Հայաստանը» խնդիր է դրել ամբողջական իշխանափոխություն իրականացնելու, դրա հնարավորությունը մենք տեսնում ենք։ Մեր ծրագիրն այն է, որ պետք է մեր բոլորիս ակտիվ մասնակությամբ ձևավորվի նոր կառավարություն, որը ոչ ուշ, քան մեկ տարվա ընթացքում պետք է իրականացնի արտահերթ ընտրություններ, այս առումով ակնկալում ենք մեր ժողովրդի ակտիվ մասնակցությունը»,-ասաց Թևանյանը։

Անդրադառնալով այս կամ այն ուժի հետ համագործակցությանը, ապա բանախոսն ասաց դրա համար երեք սկզբունք ունեն՝ պետք է գնահատական տրվի Նիկոլ Փաշինյանի վարած քաղաքականությանը, այն ուժը, որը հավակնություն ունի մեզ հետ համագործակցելու, որևէ դեպքում հնարավոր չետք է տեսնի ՔՊ-ի հետ համագործակցությունը, ամբողջական իշխանափոխության ծրագիրը մեզ հետ կիսելն է։

«Այս առումով մենք բաց ենք այդ քննարկումները վարել ու ստանալ կոնկրետ արդյունքներ»,-ասաց նա։

Թևանյանի խոսքով, այս պահին ոչ «Հանրային ձայն», ոչ էլ «Ազգային առաջընթաց» կուսակցությունների հետ բանակցություններ չկան։

«Ես մինչ այս հայտարարել եմ պատգամավորական մանդատից հրաժարվելու մասին, ես չեմ գնում Երևանի ավագանու մանդատ ստանալու ճանապարհով, ինձ համար նույնիսկ քաղաքապետ դառնալու խնդիր չէ, այլ մենք գնում ենք իշխանափոխության ճանապարհով, որպեսզի ապահովենք Հայաստանի ու Արցախի անվտանգությունը։ Այս իշխանության մնալու պարագայում մեզ սարսափելի պրոցեսներ են սպասվում, մեզ համար գերխնդիր է Հայաստանի անվտագային օրակարգի սպասարկումը»,-ասաց նա։

Ինչ վերաբերում է Հայկ Մարությանի հետ համագործակցությանը, ապա Թևանյանն ասաց՝ կօգնեն նրան անհրաժեշտ ձայներով, եթե պարզվի, որ կիսում է «Մայր Հայաստան»-ի օրակարգը՝ ամբողջական իշխանափոխության վերաբերյալ։

«Ի սկզբանե հայտարարում եմ, որ որևէ պաշտոնի չենք հավակնում, պատրաստ ենք համագործակցության այն տրամաբանությամբ, որ մեր տեսակետները կիսում են ամբողջական իշխանափոխության մասով»,-ընդգծեց նա։

Հիշեցնենք, որ «Մայր Հայաստան» դաշինքը ստացել է  35․739 (15.43%) ձայն։

Մանրամասները՝ տեսանյութում։