Ձեր վստահելի աղբյուրը

«Վիճակն օրհասական է, մեր քայլերի մեջ պետք է լինի հստակություն, կազմակերպվածություն, էմոցիոնալ ելույթներով, ցաքուցրիվ, առանց կազմակերպվածության, դրանք այն քայլերն են, որոնք բաղձալի իրավիճակ է ստեղծում այս իշխանությունների համար»,-  կառավարության դիմաց բողոքի ակցիայի ժամանակ ասաց վիրաբույժ, «Տոնոյան» ԲԿ հիմնադիր Տարոն Տոնոյանը:

Նա նշեց, որ այս անգամ իրենց համախմբվածությամբ պետք է ցույց տան, որ իրոք, արցախցիների կողքին կանգնած են. «Այն արցախցիների կողքին, որոնք իրենց ուսերին կրեցին 1990 թվականների պատերազմը և հաղթեցին, 44-օրյա պատերազմին տվեցին մոտ 900 զոհ: Մենք չգնահատեցինք արցախցիներին:

Այսօր արցախցին վիրավորներին տարհանելու համար բենզին չունի. վիրավորները դիրքերում են, չեն կարողանում  տեղափոխել հիվանդանոցներ, բայց արցախցին, վստահեցնում եմ, պատասխան գործողություններ է անում: Այլապես Ադրբեջանի ուժերը անարգել կմտնեն Ստեփանակերտ»։ 

Հիշեցնենք, որ Ադրբեջանի կողմից Արցախի դեմ սեպտեմբերի 19-ին սանձանզերծված հերթական լայնածավալ ագրեսիայի հետևանքով արձանագրվել են զոհեր և վիրավորներ և՛ քաղաքացիական անձանց, և՛ զինվորական անձնակազմի շրջանում։ Արցախի Հանրապետության ՄԻՊ աշխատակազմի կողմից հավաքագրված տվյալների համաձայն՝ քաղաքացիական բնակչության շրջանում արձանագրվել է երկու զոհ (մեկ երեխա), 26 վիրավոր (11 երեխա)։