Ձեր վստահելի աղբյուրը

Ադրբեջանի ԶՈՒ ստորաբաժանումները շարունակում են տարբեր զինատեսակներից կրակը շփման գծի երկայնքով։ Panorama.am-ը քաղաքացիների շրջանում փոքրիկ հարցում անցկացրեց՝ պարզելու, թե նրանց կարծիքով ստեղծված իրավիճակում ի՞նչ պետք է անի ՀՀ կառավարությունը։

«Չե՞ք տեսնում ինչով է զբաղված ՀՀ կառավարությունը։ Ընկած է իր քվեների հետևից, խաբելով մարդկանց քվեներն է ուզում գողանալ, ուրիշ ի՞նչ կարող է անել։ Մարդկանց ստեղ խառնում են ընտրություններով, իրենք են ասում, որ հարձակվի, իրենց գործը արած լինեն։ Գնան սատկեն՝ ավելի լավ ա, գետինը մտնեն՝ ավելի լավ ա, արդեն օր ու գիշեր չունենք իրենց երեսից։ Ժողովուրդը պիտի վեր կենա գնա, ուրիշ անելիք չունենք էսօր»,-վրդովված ասաց մի կին։

«Ինձ թվում է Հայաստանի իշխանությունը ոչինչ չի կարող անել, քանի որ գերտերություններն են որոշում էս ամեն ինչը։ Մենք անընդունակ ենք որևէ հարց լուծելու համար»,-նշեց մեկ ուրիշը։

«Ուժով պետք է պաշտպանենք մեր հայրենիքը, ուրիշ ելք ես չեմ տեսնում, եթե խոսքը չի օգնում, մենք պետք է մեզ կարողանանք պաշտպանել»,-ասաց հարցման մասնակիցը։

Մեկ այլ քաղաքացի էլ նշեց, որ հարցի պատասխանն իմանալու դեպքում Արցախում կլիներ.
«Որ էդքանն իմանամ, կգնամ էնտեղ, էղածս կորցրել եմ, էլ ոչ մի բան չեմ ուզում լսեմ ես»։

Հարցվածների մեծամասնության կարծիքով ՀՀ կառավարությունը ոչինչ ի զորու չէ անել, քանի որ չունի բավարար ռեսուրսներ.
«ՀՀ կառավարությւոնը ոչ մի բան էլ չի կարող անել, ի՞նչ պետք է անի։ Էլի արտասահմանի հետ խոսի, ԱԳՆ-ն պետք է զբաղվի այդ հարցով։ Առճակատման չենք կարող գնալ, քանի որ այդքան ուժ չունենք։ Ես տեղյակ եմ, քանի որ իմ տղան երկու պատերազմի է մասնակցել, իմաստ չունի առճակատման գնալը։ Երևի բանակցություններով, կամ դրսից ինչ-որ ազդեն Ադրբեջանի իշխանության վրա, միայնումիայն էդ, այլ բան չեմ կարող ասել»։

«Ես ինչպե՞ս կարող եմ խորհուրդ տալ այդ բարձր մակարդակի համար, միայն աչալուրջ լինեն, իրենք ելքերը կգտնեն, ես շատ փոքր եմ իրենց խորհուրդ տալու համար»։

Մի մասն էլ նշեց, որ պետք է անպայման աջակցեն Արցախին.

«Իհարկե պիտի օգնության հասնի զորքով, չէ՞ որ արցախցին էլ է հայ, ի՞նչ տարբերություն, ինչ-որ ելք պիտի գտնեն։ Անտարբերությունն ամենավատ բանն է, համարենք , որ մեզ են ռմբակոծում»։

«Պետք է իր ռազմական ուժերով պաշտպանի Արցախը»։

«Սիրտս գցում ա էս էս իրավիճակից։ Եթե աշխարհում արդարություն կա, ուրեմն պիտի ոտքի կանգնի, որ կարողանա խեղճ մարդկանց մի ձևով օգնել։ Ես չգիտեմ Հայաստանը կարո՞ղ է մի բան անել, հաստատ ավելի ուժեղ անդրադարձ կլինի Հայաստանի վրա։ Պետք է կոչ անել աշխարհին։ Ադրբեջանն իր սաղ չափերը, սահմաններն ու գծերն անցել է»։

«Ես ինչ գիտեմ, դիվանագետների հարցն է դա, նույնիսկ իրենք չեն կարող ասել»։

«Ամբողջ աշխարհը մեզնից երես է թեքել, Հայաստանը ի՞նչ կարող է ասել, ցավում եմ ուղղակի»։

Մանրամասները՝ տեսանյութում։