Ձեր վստահելի աղբյուրը

«Հրապարակ» թերթը գրում է.

«Ընտրությունների հաջորդ օրը  ՔՊ վարչության նիստն անցել է ծանր մթնոլորտում։ Տարբեր սցենարներ են քննարկել՝ ինչպես փրկել իրավիճակը: Ինչպես արեցին Գյումրիում, Վանաձորում և այլուր, որտեղ մարդկանց բերդ նստեցնելով, տեռորի ենթարկելով, նոր ընտրություններ նշանակելով, պաշտոն տալով` խլեցին քաղաքապետի պաշտոնը։ Առաջին տարբերակ են դիտարկել վերահաշվարկը՝ ՔՊ-ի կամ Արամ Սարգսյանի «Հանրապետության» օգտին 1 մանդատ գողանալու ձևով: Երկրորդը՝ մարդագողություն, և ամենահավանականը համարվել է «Հանրային ձայնից» ավագանու անդամ հավաքագրելը:

Ինչպես հայտնի է, առաջին համար Արտակ Գալստյանը և նրա հետ փոխկապակցված տարբեր անձինք կալանավորված են: Նաև կան տեղեկություններ, որ Գալստյանի և Ղուկասյանի հարաբերություններն այնքան էլ լավ չեն, ուստի ԱԱԾ-ն աշխատանքներ պետք է տանի Գալստյանի հետ և գործարքի գնա: Երրորդ սցենարը նոր ընտրություններն են, որը կարող է երկակի էֆեկտ ունենալ` ինչպես հաջողություն բերել, այնպես էլ ձախողումն ավելի ցայտուն դարձնել:

Փորձել են նաև իրենց պարտության համար մեղավորներ կարգել և պատճառները հասկանալ: Գերիշխող է եղել այն մխիթարություն-փաստարկը, որ ընտրողն իրենց խաբել է, հատկապես՝ պետական ապարատի աշխատողները, որոնք կա՛մ չեն մասնակցել, կա՛մ այլ ուժերի են ընտրել։ Բայց ամենաուշագրավն այն է, որ նույնիսկ յուրայիններից շատերը, պաշտոնատար անձինք չեն մասնակցել քվեարկությանը։ Փաշինյանը տեղեկացրել է, որ հարցում են անելու ԿԸՀ և բացահայտելու են բոլոր «դասալիք» պաշտոնյաներին, որոնք չեն աջակցել իրենց` չեն գնացել քվեարկության, և պատժելու են»։

Մանրամասները թերթի այսօրվա համարում