Ձեր վստահելի աղբյուրը

Այսօր տեղի է ունեցել Նիկոլ Փաշինյանի հեռախոսազրույցը ՌԴ նախագահ Վլադիմիր Պուտինի հետ: ՀՀ կառավարությունից հայտնում են, որ քննարկվել է Լեռնային Ղարաբաղում ստեղծված իրավիճակը: Զրուցակիցներն անդրադարձել են նաև Հայաստան-Ռուսաստան երկկողմ օրակարգի հարցերի:

Կրեմլի կայքում մանրամասներ է ներկայացված Փաշինյան-Պուտին հեռախոսազրույցից։

Նախ նշվում է, որ  հեռախոսազանգը կայացել է հայկական կողմի նախաձեռնությամբ։ Քննարկվել են Լեռնային Ղարաբաղի շուրջ ստեղծված իրավիճակի վերջին զարգացումները։ Վլադիմիր Պուտինը գոհունակությամբ նշել է, որ հնարավոր եղավ հաղթահարել հակամարտության սուր փուլը և ողջունել ռուս խաղաղապահների ակտիվ մասնակցությամբ ձեռք բերված պայմանավորվածությունը ռազմական գործողությունների ամբողջական դադարեցման և սեպտեմբերի 21-ին Բաքվի և Ստեփանակերտի ներկայացուցիչների միջև բանակցություններ վարելու վերաբերյալ։ Այդ բանակցությունները տեղի կունենան ռուսական խաղաղապահ զորախմբի ղեկավարության միջնորդությամբ։

«Չնայած դժվարին պայմաններին՝ խաղաղապահները շարունակում են հստակ կատարել իրենց առջև դրված խնդիրները և բազմակողմանի օգնություն ցուցաբերել խաղաղ բնակչությանն ու փախստականներին, այդ թվում՝ ռազմական բժիշկների կողմից։

Հույս է հայտնվել, որ ապագայում իրավիճակը կզարգանա դեէսկալացիայի և կայունացման ուղղությամբ»,- նշված է Կրեմլի կայքում։