Ձեր վստահելի աղբյուրը

«Շատ մարդիկ քննադատում են Արցախի իշխանություններին Եվլախում այսօր բանակցող փաստաթղթի համար, բայց ոչ մեկը նման իրավունք չունի, քանի որ Հայաստանի իշխանությունները Արցախին թողել են միայնակ»,-Եռաբլուրում հայտարարեց ԱԺ «Հայաստան» խմբակցության ղեկավար Սեյրան Օհանյանը:

Նա հայտնեց, որ բանակցությունների ժամանակ պետք է ամեն ինչ արվի, որպեսզի այնտեղ մնացած հայ ժողովրդի ճակատագիրը որոշվի և կարծիք հայտնեց, որ արցախցիների մեծ մասը ցանկանալու է տեղափոխվել Հայաստան, բայց մի մասն էլ չի լքի իր պատմական հայրենիքը:

Օհանյանը նաև տեղեկացրեց, որ ադրբեջանական կողմը ցուցակ է ներկայացրել Արցախի պատմության ընթացքում արժանիքներ ունեցած անձանց հանձնելու վերաբերյալ:

«Այսօր Սեպտեմբերի 21-ն է, այսօր մենք պետք է տոնեինք մեր անկախության տոնը, ամեն ինչ պետք է անել, որ հայ ժողովուրդն իր անկախությունը պահպանի»,-ասաց Օհանյանը՝ հավելելով, որ այդ օրն այցելում են Եռաբլուր և այլ պանթեոններ, որովհետև նրանք են կերտել Հայաստանի անկախությունը:

«Հայաստան» խմբակցության ղեկավարը հայտարարեց, որ գործող իշխանության վարած քաղաքականության հետևանքով հայ ժոժղովուրդը հայտնվել է այս վիճակում, իսկ վարվող խաղաղության թեզը խաբկանք է հայ ժողովրդի համար, որը վարում է թուրք-ադրբեջանական տանդեմը, քանի որ նրանց նպատակը ոչ միայն Արցախն է, այլ նաև Հայաստնաը, այստեղով ճանապարհներ ունենալը:

«Այդ խաբկանքին կուլ է գնացել Նիկոլ Փաշինյանն իր վարած քաղաքականության շնորհիվ նաև հանձնել է Արցախը: Մարդ ինչքան պետք է հեռու լինի դիվանագիտություններից, երբ հայ-ադրբեջանական բանակցությունների շրջանակներում, որտեղ պետք է լուծվի նաև Արցախի ճակատագիրը, Պրահայում ընդունում է Ադրբեջանի տարածքային ամբողջականությունը, դրանով իսկ ասելով՝ Արցախն Ադրբեջան է և՝ վերջ, այն խոսքերից հետո, երբ նա իր գործողությունն սկսել էր «Արցախը Հայաստան է և՝ վերջ», առանց հասկանալու, թե ինչ է բանկցային գործընթացը, նրա որ կետում են կանգնել ՀՀ նանխկին իշխանություններն, ինչպես պետք է շարունակել»,-ասաց Օհանյանը:

Հայտնելով, որ ՀՀ-ն անկախությունը ձեռք է բերել Արցախով, արցախյան շարժումն է հիմք հանդիսացել Սեպտեմբերի 21-ին անկախությունը կերտելու համար՝ Սեյրան Օհանյանը նկատեց. «Այսօր՝ Հայաստանի անկախության հռչակման օրը, ինքը հանձնեց Արցախի Հանրապետությունը՝ մեր անկախության վրա մի մեծ քար նետեց և այսօր փոխանակ մեկս մյուսին շնորհավորենք, ժողովրդին ուղերձով դիմենք, այսպիսի տրամադրությամբ ենք գալիս Եռաբլուր»: