Ձեր վստահելի աղբյուրը

Գերմանիան վճռականորեն դատապարտում է Բաքվի ռազմական հարձակումը և կոչ անում վերջինիս վերջնականապես և մշտապես դադարեցնել ռազմական գործողությունները: ՄԱԿ-ի ԱԽ նիստում հայտարարել է Գերմանիայի արտաքին գործերի նախարար Աննալենա Բերբոքը:

«Չափազանց շատ մարդիկ են սպանվել ընդամենը երկու օրվա ընթացքում, հազարավոր մարդիկ ստիպված են եղել փախչել իրենց տներից: Ադրբեջանն ընտրել է տեղում ռազմական ուժով իրավիճակ փոխելու ճանապարհը։ Մենք ի գիտություն ենք ընդունել հրադադարի մասին ստացված տեղեկությունները, սակայն անհրաժեշտ է, որ ամբողջապես դադարեցվի բռնությունը։ Ադրբեջանն է կրում պատասխանատվությունն ամբողջովին ու լիարժեք պաշտպանելու քաղաքացիական բնակչությանը, հատկապես` Լեռնային Ղարաբաղում ապրող երեխաներին։ Լեռնային Ղարաբաղից էթնիկ հայերի տեղահանությունն ու հարկադիր արտագաղթն ընդունելի չեն»,- նշել է նախարարը։

Աննալենա Բերբոքի խոսքով՝ Հայաստանի և Ադրբեջանի ինքնիշխանությունը և տարածքային ամբողջականությունը չպետք է դրվի հարցականի տակ:

«Դժվար է պատկերացնել, թե ինչ դժվարություններ ու տառապանքներ են կրում Լեռնային Ղարաբաղի բնակիչներն ամիսների շարունակ։ Բաքվի իշխանություննեԼրը փաստացի փակել են Լաչինի միջանցքը, խանութները դատարկ են, դեղորայք, էկետրաէներգիա, վառելիք չկա։ Վերջին մի քանի շաբաթների ընթացքում մենք աշխատել ենք բազմաթիվ գործընկերների հետ՝ ապահովելու մարդասիրական հասանելիությունը կարիքավորների, հատկապես հղիների, հաշմանդամություն ունեցող անձանց և տարեցների համար։

Երբ հույսի նշույլ ի հայտ եկավ, մարդասիրական առաքումները թույլ տվեցին Լեռնային Ղարաբաղ հասցնել, Բաքուն հավաստիացնում էր, որ ձեռնպահ կմնա ուժի գործադրումից, սակայն իր իսկ խոստումները խախտեց՝ ահռելի տառապանք պատճառելով ԼՂ բնակչությանը»,- ասել է Գերմանիայի ԱԳ նախարարը։

Նրա խոսքով՝ Լեռնային Ղարաբաղի բնակչությունն արժանի է ապրել անվտանգ, արժանի է, որ նրանց իրավունքները պաշտպանված լինեն։ «Լաչինի միջանցքը բաց պահելը կենսական կարևորություն ունի մարդասիրական պատճառներով, ինչպես նաև դա մշակութային և սոցիալական կամուրջ է Ղարաբաղում ապրող հայերի համար»,- ընդգծել է Գերմանիայի ԱԳ նախարարը։

Ըստ նրա՝ Բաքուն և Ղարաբաղի հայերը պետք է վերադառնան երկխոսության։

«Այս հակամարտությունը, որը սկսվել է 30 տարի առաջ, չափազանց մեծ զոհեր է տվել։ Տարածաշրջանում ապրող ժողովուրդը Ադրբեջանի և Հայաստանի միջև կայուն խաղաղության կարիք ունի, իսկ դրան միայն կարելի է հասնել բանակցությունների միջոցով։ Ես կոչ եմ անում ձեզ վերադառնալ բանակցություններին Եվրամիության միջնորդությամբ։

Ցանկանում եմ ընդգծել` որևէ երկիր չպետք է ներկայիս իրավիճակն օգտագործի Հայաստանի ժողովրդավարությունն ապակայունացնելու համար։ Լեռնային Ղարաբաղում կանայք, տղամարդիկ և երեխաներն ու ընդհանրապես տարածաշրջանի բնակիչներն արժանի են ապրել առանց վախի, առանց բռնության, առանց իրենց տներից հարկադրաբար հեռացվելու, առանց իրենց իրավունքներից, լեզվից, կրոնից զրկվելու վախի։ Նրանք արժանի են ապրելու խաղաղության մեջ, ինչպես բոլորս»,- իր ելույթում ասել է Բերբոքը։