Ձեր վստահելի աղբյուրը

Չեմ կարծում, որ ամեն ինչ կորցրել ենք, բայց եթե այս խումբը մնա իշխանության, ապա մենք ոչ միայն Արցախը, այլև Հայաստանն ենք կորցնելու։ Լրագրողների հետ զրույցում ասաց Սթենֆորդի համալսարանի քաղաքագիտության դոկտոր Արթուր Խաչիկյանը։

«Եթե մի երկրի ղեկավարություն ասում է, որ ժողովրդի ցեղասպանությունն իր գործը չէ՝ թող Ռուսաստանը պաշտպանի, և հետո այնտեղ ցեղասպանություն էլ չկա, եթե մի կառավարություն իր ԱԳ նախարարին ուղարկում է ՄԱԿ, որը փորձում է մեր դիրքը պաշտպանել, բայց դրանից հետո նրան ներկայացնում են ՀՀ ղեկավարի  խոսքը, թե Արցախում ոչ մի պրոբլեմ չկա, նշանակում է, որ սա թշնամու կառավարություն է։ Թշնամուն նույնիսկ նման բան չեք ցանկանա», - նշեց Արթուր Խաչիկյանը։

Նրա խոսքով՝ եթե այսպես շարունակվի, ապա Հայաստանը չի լինելու։ «Մարդիկ պետք է սա հասկանան, պետք է սրճարաններից դուրս գան, այնպիսի նորություններ են ստացվում Արցախից, որ անգամ չեմ կարողանում կարդալ»,-  ասաց նա։

Արթուր Խաչիկյանը նշեց նաև, որ թավշյա հեղափոխության ժամանակ արտասահմանյան բազմաթիվ լրատվամիջոցներ լուսաբանում էին Հայաստանում տեղի ունեցող իրադարձությունները, իսկ այսօր միայն մեկ կամ երկու ԶԼՄ է Արցախի ցեղասպանության մասին բարձրաձայնում։ «Մեր ժողովրդին բնաջնջում են, բայց այդ ԶԼՄ-ները չկան, միայն երկու լրատվամիջոց կա՝ Ֆրանսիայից և Գերմանիայից։ Նույնիսկ նրանց համար է զարմանալի, որ օտարերկրյա այլ լրատվամիջոցներն այստեղ  չեն, բայց ժողովուրդ է բնաջնջվում»,- նշեց նա։

Արթուր Խաչիկյանի խոսքով՝ Նիկոլ Փաշինյանը իշխանության եկավ խաբելով, ասում էր, թե Արցախի հարցն են լուծելու, մարդիկ երջանիկ են ապրելու, մինչդեռ նրա իշխանության օրոք չի եղել մեկ օր, որ մարդիկ իրենց երջանիկ զգան․ «Մի օր չեղավ աչքներս բացենք ու սև օր չլինի։ Մարդ վախենում է հեռախոսը միացնել»։ 

Նա նշեց, որ այսօր բոլորը դեմ են այս իշխանություններին, մարդիկ պահանջում են իշխանափոխություն և ոչ մեկ չի կարող այս շարժումը տապալել" «Այս շարժումը միայն կարող է տապալվել ըընդդիմության լիդերների գործողությունների պատճառով, սակայն չեմ կարծում, որ դա կլինի»,- հավելեց Արթուր Խաչիկյանը։