Աշխատանք և անվճար կացարան. ինչ են առաջարկում տեղահանված արցախցիներին
Սոցիալական ցանցերում մարդիկ սկսել են հայտարարություններ տարածել՝ Արցախից բռնի տեղահանվածներին աշխատանքով և կեցության վայրով ապահովելու համար։
Ձեռնարկատեր Հարութ Համբարձումյանը «Ֆեյսբուք» սոցիալական ցանցի իր էջում հայտնել է, որ Արցախից տեղահանված հայրենակիցների համար իր ընկերություններում ավելացնում է շուրջ 50 նոր աշխատատեղ։
«Մասնագիտություններ՝
1.Թարգմանչուհի
2.Հաշվապահ
3.Տուրիզմի մասնագետ
4.Վաճառքի խորհրդատու
5. Կահուքագործ
6. Բանվոր
7. կահուքագործի օգնական
8. Առաքիչ
9. Վարորդ
10. Կահույքի սրահում վաճառող խորհրդատու։
Նաև վերը նշված բոլոր մասնագիտությունների մասով կկազմակերպենք անվճար ուսուցում։
Աշխատել կամ սովորել ցանկացողները ինքնակենսագրականները (CV) ուղարկեն այս էլ հասցեին՝ [email protected]։
Վստահ եմ սա վարակիչ նախաձեռնություն է լինելու բոլոր գործարարների համար»,- գրել է Հարութ Համբարձումյանը։
Սպորտային մեկնաբան Սենիկ Կարա-Պողոսյանն էլ տեղեկացնում է, որ աշխատանք կա Արցախից եկած սպորտային լրագրողների համար։«Խնդրում եմ կապ հաստատել PROFFOOTBALL-ի հետ», - գրել է նա։
«UpGrade» ընկերությունն էլ դասընթացներ է կազմակերպում արցախցիների համար։ Մասնավորապես, ընկերության ֆեյսբուքյան էջում նշվում է.
«Արցախից տեղահանված սիրելի հայրենակիցներ,
Երեկվանից ձեզնից ստանում ենք նամակներ` մասնագիտական վերապրոֆիլավորումների և հնարավոր աշխատանքի վերաբերյալ:
Ակնհայտ է, որ առաջին անհրաժեշտության հարցերը հոգալուց հետո (սնունդ, կացարան) առաջանալու է զբաղվածության և աշխատանքի հարց:
UpGrade-ը շարունակում է իր աշխատանքները` միտված այս հարցերի լուծմանը: Արդեն կարող եք գրանցվել հոկտեմբերի 3-ից մեկնարկող դասընթացներին (սոցիալական մեդիա մարքեթինգ /SMM/, գրաֆիկ դիզայն, հանրային կապեր, կոնտենտ մարքեթինգ և այլն/:
Ավարտին, ինչպես նախկինում, աշխատանքի հնարավորություն կունենաք UpGrade-ի կամ մեր գործընկերների թիմերում:
Կարող եք գրել մեզ նաև Ձեր առաջարկները` ի՞նչ դասընթացների կուզենաք մասնակցել: Կարող եք գրել մեր ֆեյսբուքյան էջին կամ զանգահարել 033 577 333 հեռախոսահամարով»։
«HS Rochet» ընկերությունն էլ աշխատանք է առաջարկում ՏՏ ոլորտի մասնագետներին։
«Արցախից ժամանած հարգելի հայրենակիցներ,
«ԷՅՉ ԷՍ ՌՈՔԵՏ» ՍՊԸ-ում Ձեզ համար պատրաստել ենք հետևյալ թափուր աշխատատեղերը՝
-ՎԵԲ և Գրաֆիկ դիզայներ (UI/UX)
-ՏՏ ոլորտի վաճառքի մենեջեր (անգլերենի B2 իմացությամբ)
-Կոնտենտ մշակող և գրող (Հայերեն, Ռուսերեն, Անգլերեն լեզուներով)
Ինքնակենսագրականները (CV) կարող եք ուղարկել [email protected] էլեկտրոնային հասցեին
Հարցերի դեպքում ամեն օր 18:00ից հետո կարող եք զանգահարել 095515045 հեռախոսահամարով»,- նշված է ընկերության ֆեյսբուքյան էջում։
Արցախցի մատնահարդարների համար ևս աշխատանք կա։ «Color BOOM Nail Studio»-ն հայտնում է, որ ոչ միայն պատրաստ են աշխատանքի ընդունել մատնահարդարների, այլև անհրաժեշտության դեպքում նրանց անվճար վերապատրաստել։ Մատնահարդարները կարող են զանգահարել 044 520 520 հեռախոսահամարով կամ գրել Նորա Աբրահամյանին։
Բռնի տեղահանված արցախցիների համար այսօր առաջնահերթը կացարանով ապահովելն է։
Սոցցանցում արդեն իսկ կան հայտարարություններ, որոնք անվճար ժամանակավոր կացարաններ են տրամադրում մեր հայրենակիցներին։
Դրանցից մեկը. «Դիլիջանում մինչև 40 հոգու համար ազատ տեղ կա հյուրանոցային համալիրում (անվճար )։ Կապվել . 098 137331 Միրան»։
Մեկ այլ օգտատեր Հակոբ Ասատրյանը հայտնում է, որ բարեկամներից մեկը կարող է Սպիտակում առանց վարձի առանձնատուն տրամադրել՝ երեք ննջարանով և հողամասով։
«Սիրելի արցախցիներ, բարեկամներիցս մեկը կարող է Սպիտակում առանց վարձի առանձնատուն տրամադրել՝ երեք ննջարանով և հողամասով, միայն թե 15 տարի չեն բնակվել եւ վերանորգման ու տաք ջրի հարցերը պետք է լուծել։ Եթե հետաքրքրվող լինի, անձնականով դիմեք ինձ՝ կկապեմ իրենց հետ»,- գրել է նա։
Ֆեյսբուքյան օգտատեր Ասանեթե Ալոյանն էլ նշել է, որ տեղահանված արցախցիներին պատրաստ են անահատույց հիմունքներով տրամադրել ք. Արթիկում իրենց սեփական տունը։ «3 սենյակ է, կոմունալ հարմարություններ կան, մոտակայքում և՛ դպրոց, և մանկապարտեզ կա»։
Անշարժ գույքի գործակալություններից մեկն էլ Արցախից տեղահանվածների համար վարձակալությամբ բնակարանները տրամադրում է առանց միջնորդավճարի, որը մեկ ամսվա վարձի 50%-ն է կազմում։
«Տաշիր» բարեգործական հիմնադրամից էլ հայտնել են, որ կացարան կտրամադրվի Արցախից տեղահանված 1000 բնակչի Լոռու մարզի Տաշիր համայնքում:
«Հաշվի առնելով բազմահազարանոց արցախահայությանը օժանդակելու, ժամանակավոր կացարան տրամադրելու ու օժանդակելու անհրաժեշտությունը, ընկերությունը կանի հնարավորինս մեր հայրենակիցներին աջակցելու համար», - տեղեկացրել են «Տաշիր» ընկերությունների խմբի մամուլի ծառայությունից:
Սպիտակ բանակը ևս անմասն չի մնացել։ Բազմաթիվ բժիշկներ հայտնել են, որ պատրաստ են անվճար բուժօգնություն տրամադրել արցախցիներին։
Բժիշկ մաշկաբան Հովհաննես Դալլաքյանը գրել է.
«Արցախից բռնի տեղահանված մեր բոլոր հայրենակիցներին։
Բժիշկ մաշկաբան Հովհաննես Դալլաքյան -նն իր անհատույց բուժօգնությունն է առաջարկում։
Մաշկաբան սեռավարակաբան.
Կարմիր բլուր - պոլիկլինիկա
Հեռախոսահամար։
043797779»։
«Տոնուս-Լես» դեղատնային ընկերությունը և «Տոնուս-Լես Ռեմեդի» դեղատնային ցանցն էլ պատրաստ է անցկացնել անվճար ուսուցում և պրակտիկա դեղագիտության կամ դեղագործության ոլորտի մասնագետների համար։
«Ուսուցումից հետո հնարավորություն կընձեռնվի աշխատանքի անցնել «Տոնուս-Լես Ռեմեդի» դեղատնային ցանցում։
Հարցերի դեպքում կարող եք զանգահարել 098899529 հեռախոսահամարով։
Բարձրակարգ պրակտիկան և աշխատավարձը երաշխավորված են»,- տեղեկացնում են ընկերությունից։
Բժիշկ-էնդոկրինոլոգ Սերգեյ Հակոբյանն էլ Արցախից բռնի ուժով տեղահանվածներին պատրաստ է անհատույց ցուցաբերել թերապևտիկ-էնդոկրինոլոգիական օգնություն անհատույց։ Բժիշկին կարող եք զանգահարել 093838889 հեռախոսահամարով։
Սրտաբան ամուսիններ Էդիտա Եղիազարյանն ու Համբարձում Եղոյանը ևս արցախցիներին պատրաստ են բուժօգնություն տրամադրել անվճար։ Նրանց հասցեն է՝ Հերացի թիվ 1 համալսարանական հիվանդանոց, հեռախոսահամար՝ 094711124։
«Բարի տնակում» էլ պատրաստ են անվճար վերականգնողական թերապիաներ նվիրել արցախցի երեխաներին։
«Եթե ձեր երեխան ունի կարիք.
-հոգեբանի
-լոգոպեդի
-ֆիզիոթերապիստի կամ բուժիչ մերսման մասնագետի
ծառայությունների, ապա կարող եք գրանցվել 89-09 կարճ համարով:
Սիրով կսպասենք»,- նշված է «Բարի տնակ»-ի ֆեյսբուքյան էջում։
Լրահոս
Տեսանյութեր
ՈւՂԻՂ. Տրանսպորտը թանկացնում են նախկինների մերժած հաշվարկով. Պիպոյանը փաստաթղթեր է հրապարակում
