Ձեր վստահելի աղբյուրը

«2020 թվականի սեպտեմբերի 27-ը հայ ժողովրդի պատմության ամենաարյունալի էջերից է։ Չարաբաստիկ մի ամսաթիվ, որ գլխիվայր շուռ տվեց հայ ժողովրդի կյանքը»,- «Եռաբլուր» զինվորական պանթեոնում լրագրողներին ասաց 44-օրյա պատերազմում զոհված Արցախի հերոս Ալեն Մարգարյանի մայրը՝ տիկին Նազելին։

Նա վստահ է՝ յուրաքանչյուր ադեկվատ քաղաքացի, ով խղճի գեթ մի կաթիլ ունի իր մեջ, չի կարող անտարբեր մնալ այս ցավի, տառապանքի, ողբի, նկատմամբ, որ 3 տարի շարունակ իրենց ընտանիքների մշտական ուղեկիցն է դարձել, գիտակցության ու ենթագիտակցության մեջ է։

«Չեմ ուզում առանձնացնել Արցախ կամ Հայաստան։ Որպես կին, մայր, քաղաքացի,  ինձ համար ամենաառաջնայինը մարդ արժեքն է, և այսօր կանգնած ենք  ազգային գոյապահպանման խնդրի առջև։ Ցավոք։ 

Դրանում մեղավոր են հավասարաչափ բոլորը՝ հներն ու նորերը, միասին, ձեռք ձեռքի տված, ամենաստորին օղակում գտնվող պաշտոնյայից մինչև ամենավերին օղակում կանգնած։

Հավասարաչափ հանցագործ են բոլոր նրանք, ովքեր տարիների ընթացքում  հնարավորություն ունեին Արցախի հարցին իրավական կարգավիճակ տալ, սակայն հանցավոր անտարբերությամբ, անփութությամբ, մեծամտությամբ այդ հարցը մղեցին չգիտեմ որերորդ պլան։

Հավասարաչափ  հանցագործ են այն նորերը, որոնք գալով իշխանության՝ խոստումներ  տալով, դարձյալ հարցին լուծում չտվեցին ու դեռ ավելին՝ մեր զավակներին, ովքեր դեռ պետք է լավ գործ անեին այս պետության համար, դատապարտեցին մահվան»,- ասաց տիկին Նազելին:

Նա ասաց, որ իր որդին առանց մի վայրկյան մտածելու՝ գնաց կյանքը տալու այս ազգի, պետության, ժողովրդի համար։

«Ես չեմ առանձնանում Արցախ, Հայաստան։ Խնդիրը հայ ազգինն է, ընդհանրապես։ Գիտակցեք սա և հնարավոր ամեն բան արեք որպեսզի մաքուր ու նոր էջից սկսվի, դաշտը տվեք, մաքրեք ապրիկար, պղծված մարդկանցից, դաշտը հանձեք մաքուր կենսագրություն ունեցող, գիտությունը, կրթությունը, արվեստը արևժորող մեր խելացի երիտասարդներին, մի օգտագործեք նրանց ներուժը պիղծ նպատակներով։

Թույլ տվեք կայանան, կրթվեն ու կերտեն հայ ազգի ապագան, որ հզոր պետություն կառուցենք, կարողանանք պարզ ճակատով նայենք աշխարհին, մրցունակ լինենք աշխարհի բոլոր համալսարաններում»,- ասաց տիկին Նազելին։