Ձեր վստահելի աղբյուրը

Փաստաբան Մուշեղ Շուշանյանին կալանավորելու վերաբերյալ քննիչի միջնորդությունը դատարանը բավարարել է։ 

«Հելսինկյան ասոցիացիա» իրավապաշտպան ՀԿ-ն արածել է հայտարարություն, որտեղ ասված է.

«Փաստաբան, իրավապաշտպան և լավ ընկեր Մուշեղ Շուշանյանը կալանավորվել է։ Քրեական վարույթով նրա նկատմամբ ընտրվել է խափանման ամենախիստ միջոցը, առանց հաշվի առնելու նրա անձն ու վաստակը։

Դատապարտում ենք որպես պատիժ կիրառված խափանման միջոցի կիրառումը, առավել ևս, որ Մուշեղին վերագրվող արարքի (հիմնավոր կասկածի) հիմնավորումը առերևույթ տապալվելու է քննության ընթացքում։

Պահանջում ենք անհապաղ ազատ արձակել Մուշեղ Շուշանյանին, անհրաժեշտության դեպքում Հելսինկյան ասոցիացիան և նրա յուրաքանչյուր անդամը պատրաստ են երաշխավորելու Մուշեղի պատշաճ վարքագիծը»։

Հիշեցնենք, որ քննչական կոմիտեն նրան ձերբակալել էր նախկին արած հայտարարությունների ու գրառումների համար.

«2023թ. մայիսի 9-ին «Ազգային ժողովրդավարական բևեռ» յութուբյան էջում զետեղվել է «Նիկոլի ֆիզիկական ոչնչացումը միանգամայն արդարացված է». Մուշեղ Շուշանյան» վերտառությամբ տեսանյութ, որի ընթացքում Մ.Շուշանյանը ՀՀ վարչապետի նկատմամբ, քաղաքական հայացքներով պայմանավորված, հնչեցրել է բռնություն գործադրելու հրապարակային կոչեր, արդարացրել նմանօրինակ գործողությունները:

Շարունակելով իր հանցավոր՝ բռնություն գործադրելու հրապարակային կոչեր հնչեցնելու, բռնությունը հրապարակայնորեն արդարացնելու և քարոզելու, ինչպես նաև՝ այդ նպատակով նյութեր տարածելու գործունեությունը, իր ֆեյսբուքյան «Mushegh Shushanyan» անվամբ գրանցված էջում, Մ.Շուշանյանն այսօրինակ բովանդակությամբ գրառում է կատարել նաև սեպտեմբերի 22-ին, որտեղ մասնավորապես ասվում է. «Հայոց զարթոնքը կարող է սկսվել մի պայմանով միայն՝ եթե կիկոլը ու ողջ հայրենավաճառների խմբակը ինքնաբուխ տարերային կերպով մահապատժվեն»:

Մեկ այլ գրառման մեջ էլ օգտատերը գրել է. «կիկոլին, դրա կուտոկից ցանկացածին որտեղ բռնեք սատկացրեք, հնարավորինս դաժան, բայց նաև արդյունավետ, սաղ չմնան. աած, ոստիկանություն, սպասում եմ, եկեք, տարեք»:

Նկատի ունենալով, որ վերոնշյալ գրառումներում առերևույթ առկա են հանցագործության հատկանիշներ՝ ՀՀ քննչական կոմիտեի ԵՔՔՎ Ավան և Նոր Նորք վարչական շրջանների քննչական բաժնում նախաձեռնվել են քրեական վարույթներ, որոնք, օբյեկտիվ և համակողմանի քննություն կատարելու նպատակով, միացվել են մեկ վարույթում:

Մ.Շուշանյանի նկատմամբ հարուցվել է հանրային քրեական հետապնդում՝ ՀՀ քրեական օրենսգրքի 330-րդ հոդվածի 2-րդ մասի 3-րդ կետի հատկանիշներով:
Վարույթի շրջանակներում որոշում է կայացվել՝ դատարան ներկայացնելու նպատակով վերջինիս ձերբակալելու վերաբերյալ:

Սեպտեմբերի 28-ին Մ․Շուշանյանը ձերբակալվել էր։ Նախաքննությունը շարունակվում է»։

Ծանուցում.  Հանցանքի համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: