Ձեր վստահելի աղբյուրը

«Հռոմի ստատուտի վավերացումը որևէ առնչություն չունի Ռուսաստանի հետ մեր երկկողմ հարաբերությունների տեսանկյունից, սա մենք փոխանցել ենք նաև մեր ռուս գործընկերներին»,- ԱԺ-ում լրագրողների հետ ճեպազրույցում ասաց ՔՊ խմբակցության պատգամավոր Էդվարդ Աղաջանյանը:

Նա նշեց, որ իրենք, բնականաբար, ծանոթ են այս խնդրի առնչությամբ Ռուսաստանից հնչող արձագանքներին, բայց դրանից Հայաստանի դիրքորոշումը չի փոխվում. «Հայաստանը սուվերեն պետություն է, և մենք պետք է առաջնորդվենք բացառապես Հայաստանի պետական շահերով»։

Հարցին՝ բացառո՞ւմ են, որ Ռուսաստանը սպառնալիքներից կանցնի կոնկրետ գործողությունների Հայաստանի դեմ, Է.Աղաջանյանը պատասխանեց. «Դրանք հարցեր են, որոնց մասին ես հիմա չեմ բարձրաձայնի, բայց Հայաստանի ղեկավարությունը հնարավոր սցենարների պարագայում համապատասխան քայլեր կձեռնարկեն։ Պնդելու որևէ հիմք, որ նման գործողություններ կլինեն, այս պահին չունենք»։

Լրագրողի դիտարկմանը, օրինակ՝ գազը, էլեկտրաէներգիան թանկանա, Լարսում արդեն խնդիրներ կան, նա կրկնեց. «Այս պահի դրությամբ որևէ հիմնավոր պատճառ պնդելու, որ նման քայլեր կլինեն, չկա, այնուամենայնիվ, եթե նմանատիպ քայլեր լինեն, Հայաստանն ունի ղեկավարություն, համապատասխան քայլեր կիրականացվեն»։

Հարցին՝ Հայաստանն ուզո՞ւմ է ՌԴ-ին թշնամի դասել, ՔՊ-ական պատգամավորը պատասխանեց. «Ոչ, ոչ մի կերպ։ Հայաստանը Ռուսաստանին թշնամին չի համարում»։