Ձեր վստահելի աղբյուրը

Ազգային  ժողովում Հռոմի ստատուտը վավերացնելու նախագծի քննարկմանը ՔՊ-ական Էդուարդ Աղաջանյանը հիմնական զեկուցող  Միջազգային իրավական հարցերով ներկայացուցիչ Եղիշե Կիրակոսյանից հետաքրքրվեց՝  եթե մեղադրվող կողմը չի հանդիսանում ստատուտը վավերացրած կողմ, բայց հանդիսանում է դատական գործընթացի մաս, հնարավո՞ր է մեղադրվող կողմին կանչել դատարան, կա՞ նման պրակտիկա։

Նա պատասխանեց, որ կանոնադրության իրավազորությունն աշխատում է երկու տրամաբանությամբ՝ 12-րդ հոդվածի հիման վրա։

«Մեկը, որ գործում է տարածքի նկատմամբ, մյուսը վավերացրած երկրի կամ իրավազորությունը ճանաչած երկրի քաղաքացիների նկատմամբ։

Եթե կատարվում է պատերազմական հանցագործություն կամ մարդկության դեմ ուղղված հանցագործություն  վավերացրած պետության տարածքում, անկախ նրանցից, թե հանցագործություն կատարած անձանց պետությունը վավերացրել է այն, թե ոչ, ենթական են լինելու դատարանի իրավազորությանը։

Բոլոր 123 վավերացրած պետությունները, եթե Հայաստանը վավերացնի, արդեն 124-րդ կլինի, պարտավորություն են ունենալու համագործակցել դատարանի հետ ու այդ անձանց հանձնել, եթե անհրաժետություն կա,  փոխանցել դատարանին։ Դրա համար անդամ պետությունների համագործակցությունը շատ կարևոր է»,- ասաց Եղիշե Կիրակոսյանը։

Հիշեցնենք, որ Աժ-ում քննարկվում է Հռոմի ստատուտը՝ 1998 թվականի հուլիսի 17-ին ստորագրված` Միջազգային քրեական դատարանի Հռոմի կանոնադրությունը վավերացնելու եւ կանոնադրության 12-րդ հոդվածի 3-րդ մասի համաձայն Միջազգային քրեական դատարանի իրավազորությունը հետադարձորեն ճանաչելու մասին հայտարարություն ընդունելու մասին նախագիծը, որը ներկայացվել է ԱԺ կառավարության կողմից։  Նախագծի քննարկումն անցնում է առանց ընդդիմադիր խմբակցությունների պատգամավորների։