Ձեր վստահելի աղբյուրը

«Որովհետև Հայաստանի իշխանությունները որոշեցին այդ հարցը բերել օրակարգ, երբ միջազգային քրեական դատարանը Պուտինին ձերբակալելու օրդեր ստորագրեց»,- պատասխանելով հարցին, թե ինչո՞ւ է ՌԴ-ն ծայրահեղ վատ է վերաբերում ՀՀ-ի կողմից Հռոմի ստատուտի վավերացմանը՝ ասաց ԱԺ «Հայաստան» խմբակցության պատգամավոր Արթուր Խաչատրյանը: 

Նրա կարծիքով՝ Հռոմի ստատուտի վավերացումը կհակասի ՀՀ սահմանադրությանը և տեղեկացրեց, որ շատ երկրներ, մասնավորապես ԱՄՆ-ը, այն չեն վավերացրել:

«Փաշինյանը Ալիևին կոչել է կիրթ և կառուցողական գործընկեր, առաջ են տանում «Խաղաղության օրակարգ», դուք կարծո՞ւմ եք, որ ստատուտը վավերացնելուց հետո ՀՀ իշխանությունները Ալիևին դատի՞ են տալու»,-հարց հնչեցրեց Խաչատրյանը և տարակուսեց որ իշխանության ներկայացուցիչները նույնիսկ ԱԺ ամբիոնից հայտարարեցին, թե ստատուտը վավերացնելուց հետո Հայոց Ցեղասպանության համար դատի են տալու Թուրքիային:

Ընդդիմադիր պատգամավորը կարծիք հայտնեց, որ Հռոմի ստատուտի վավերացումն միանշանակ բացասական կազդի հայ-ռուսական բարդ հարաբերությունների վրա, քանի որ «թշնամական քայլ է»:

«Հայաստանը բռնել է արտաքին քաղաքական վեկտորի փոփոխության ուղղություն և ՌԴ-ից հակազդեցությունը սպասելի էր»,-ասաց Արթուր Խաչատրյանը և փաստեց, որ առավոտյան արդեն տեղեկություն է ստացել, որ Լարսի անցակետում նույնիսկ տարանցիկ բեռնատարերի տեղաշարժերի դժվարացման փաստ է արձանագրվել, մասնավորապես՝ դեպի Ղազախստան կոնյակի տարանցման: