Ձեր վստահելի աղբյուրը

«Ազգային ժողովի այս նիստը գումարվում է  Ադրբեջանի կողմից շարունակաբար հրեշավոր հանացագործությունների, այն է՝ շուրջ 9 ամիս Արցախը  շրջափակելու, սովամահաության մատնելու, մեր ժողովրդին պատերազմի  միջոցով բռնի տեղահանությունը կազմակերպելու և Արցախը հայթափելու ակտից հետո»,- Ազգային ժողովի հերթական քառօրյայի սկզբում հայտարարեց «Հայաստան» խմբակցության պատգամավոր Արծվիկ Մինասյանը։

Նա նշեց, որ տրամաբանական կլիներ,  որ այս օրակարգում  պետք է առաջին կարևոր հարցերից լիներ  իրավիճակի վերլուծության գնահատման և մեր անելիքների մասին այսպես կոչված ժողովրդի  բարձրագույն ներկայացուցչական մարմնի դիրքորոշումը, բայց մենք տեսնում ենք, որ նման բան չկա։

«Գուցե  սրա պատճառն այն է,  որ քաղաքական մեծամասնությունն ու  գործող իշխանությունը փորձում է  քողարկել իր մեղսակցությունն  այս ազգային ողբերգությանը կամ որ ամենավատն է ՝ փորձել մեղքը բարդել այլոց վրա։ Մինչդեռ սա ոչ  միայն սխալ է, սա վտանգավոր ու կործանարար է, քանի որ գործող իշխանությունը շարունակում է  իր ազգակործան  քաղաքականությունը, որի հետևանքները մենք տեսնում ենք»,- ասաց Ա.Մինասյանը։

Նա նշեց, որ նույնիսկ հարկ չհամարվեց հենց ԱԺ նիստի սկզբում հարգել մեր զոհերի հիշատակը, նաև երեկ հայկական կողմը զոհ է ունեցել։

Արծվիկ Մինասյանն ասաց, որ ԱԺ քառօյայի օրակարգում ներառված է հարց, որը հակասահմանադրական ընթացակարգով է ներկայացված. «Ազգային ժողովն իրավասու չէ  Հռոմի ստատուտն վավերացնելու հարցն առանց սահմանադրական փոփոխությունների քննարկման առարկա  դարձնել իր բազմաթիվ ռիսկերով հանդերձ, որոնց վերաբերյալ կարիք կար ամբողջական, խորը, բոլոր գործողությունները ձեռնարկելուց հետո նոր անել»։