Ձեր վստահելի աղբյուրը

«Երբեք միջազգային քրեական դատարանի պակտիկայում չի եղել, երբ երկրի գործող նախագահը փոխանցվի  միջազգային քրեական դատարանին»,- Ազգային ժողովում Հռոմի ստատուտի վավերացումից հետո լրագրողներին ասաց  ՔՊ-ական պատգամավոր Վլադիմիր Վարդանյանը։

Նրա կարծիքով, Միջազգային քրեական դատարանի կայացման տեսանկյունից ՄԱԿ-ի անվտանգության խորհրդի մշտական անդամ երկրի նկատմամբ նման ակտեր կայացնելը կարող է  խոչընդոտել դատարանի հետագա կայացմանը։

«Երկրորդ, անկախ ամեն ինչից, անկախ՝ կվավերացվեր ստատուստը, թե ոչ, Հայաստանի և  Ռուսաստանի հարաբերություններն այնպիսին էին, որ ստատուտի 98-րդ հոդվածի 2-րդ մասի հիման վրա համապատասխան համաձայնագրի առկայութունը մշտապես  օգտակար կլիներ երկկողմ հաբերությունների զարգացման համար»,-  ասաց Վարդանյանը։

Հարցին՝  դուք ևս պնդում եք,  որ որևէ վտանգ չկա, եթե ՌԴ նախագահ Վլադիմիր Պուտինը գա Հայաստան... , դեռ հարցը չավարտած՝ ՔՊ-ական պատգամավորը պատասխանց. «Ինձ մի հարց է հուզում և շատ հստակ. մենք ունենք իրավիճակ, երբ 2020 թվականից ի վեր բախվում ենք բազում միջազգային հանցագործությունների, ռազմական, մարդկության դեմ ուղղված հանցագործությունների հետ, որոնք իրենց բնույթով հակաբարոյական են։ Այս ամենով հանդերձ, ինձ մոտ զարմանք է առաջացնում, թե ինչպես կարելի է դեմ խոսել կամ ինչ-որ վերապահումներ  ունենալ մի գործիքի դեմ, որը ստեղծված է  նման արարքները կանխելու և նման արարքների համար համապատասխան անձանց պատասխանատվության կանչելու համար։

Յուրաքանչյուր ինքնիշխան պետություն իրավասու է ինքը որոշել, թե որ միջազգային իրավական փաստաթուղթն է վավերացնում»։

Լրագրողը կրկնեց հարցը. «Դուք ևս պնդում եք, որ Պուտինին ձերբակալելու որևէ վտանգ չկա, նա  անձեռնմխելիություն ունի՞»։ Վ. Վարդանյանը պատասխանեց. «Եթե միջազգային քրեական դատարանի կանոնադրության վավերացման հարցը ձեզ հուզում է միայն այդ կոնտեքստում, ես չեմ էլ ուզում անդրադառնալ այդ հարցին»։

Հարց հնչեց, թե ինչո՞ւ ստատուտը վավերացվեց միայն 60 կողմ ձայնով, չէ՞ որ ՔՊ-ական պատգամավորներն ավելի շատ են, ՔՊ-ական պատգամավորն ասաց. «Մարդ կա գործուղման է, մարդ կա հարգելի պատճառով բացակայում է։ Տարաձայնություններ չեն եղել։

Տարաձայնություններ թող որոնի ընդդիմությունն իր իսկ համակիրների շրջանում»։