Ձեր վստահելի աղբյուրը

«Հայաստան պետության առկայության պայմաններում տեղի ունեցով հայերի մի նոր ցեղասպանություն: Սա փաստ է»,-կառավարության հետ ԱԺ-ում հարցուպատասխանի  ժամանակ հայտարարեց «Հայաստան» խմբակցության պատգամավոր Արմեն Ռուստամյանը՝ հավելելով, որ Հայաստանի վարչախումբը միայնակ թողեց Արցախին:

Նրա խոսքով նախադեպ առաջացավ, որ ժողովրդի որևէ մի հատված մտածի, որ իր փրկությունը լինի ոչ թե պետության, այլ՝ հենց այդ հատվածի գործը:

Ռուստամյանն ասաց որ, հայտարարելով, թե չի ներքաշվելու Արցախի ժողովրդի դեմ սանձազերծված ագրեսիային՝ Փաշինյանը միայնակ է թողել Արցախի ժողովրդին՝ իրենից բազմապատիկ անգամ գերզանցող հրոսակների դիմաց:

«Նման հայտարարություններից հետո միանգամից արժանացաք գովասանքի գլխավոր ցեղասպանի կողմից: Մյուս հայտարարությունը, թե Ադրբեջանի գործողությունները չեն սպառնում խաղաղ բնակչությանը, որը լիովին օգտագործվեց և շարունակվելու է օգտագործվել մեր դեմ և արդարացնելու Ադրբեջանի գործողությունները: Միթե պարզ չէ, որ ձեր այս քաղաքականությունը դարձել է Ադրբեջանի քաղաքականության հայելային արտացոլումը: Կա՛մ փոխեք քաղաքականությունը, կա՛մ հեռացեք»,-Փաշինյանին դիմեց Ռուստամյանը:

Նիկոլ Փաշինյանն հայտարարեց, թե անարդար է արցախցիներին մենակ թողնելու մեջ իրեն  ուղղված մեղադրանքները, քանի որ վերջին երեք տարվա ընթացքում մեկ միլիարդ դոլարի օգնություն են հատկացրել Արցախին:

Փաշինյանը նաև հայտարարեց, թե քաղաքացիական անձանց անվտանգության մասին հայտարարություն է արել, որպեսզի զոհերի թիվը մեծ չլինի:

Արմեն Ռուստամյանն էլ ասաց, թե նման հայտարարությամբ Նիկոլ Փաշինյանը հակասել է ՀՀ ԱԳՆ-ի դիրքորոշմանը, ըստ որի՝ Արցախում էթնիկ զտումներ են տեղի ունեցել: