Ձեր վստահելի աղբյուրը

«Հազարամյա պատմության մեջ առաջին անգամ Արցախը հայաթափվեց, Արցախի ժողովուրդը ենթարկվեց էթնիկ զտման, ցեղասպանության թուրք-ադրբեջանական տանդեմի կողմից ռուս խաղաղապահների անգործության, միջազգային հանրության լռության և ձեր՝ Նիկոլ Փաշինյան, անմիջական մեղսակցության  հետևանքով»,- ԱԺ հարցուպատասխանի ժամանակ ասաց «Հայաստան» խմբակցության պատգամավոր Աննա Գրիգորյանը։

Նա նշեց, որ ինչքան էլ փորձի Նիկոլ Փաշինյանը  «բայց-եր անել, ստորակետեր դնել, պատասխանատվության  բաժինը բոլորի վրա բարդել ու մնա իբր որևէ բանում չներգրավված անձ»,  պատմության դասագրքերում գրվելու է, որ Արցախն ընկավ Նիկոլ Փաշինյանի օրոք։

«Մենք 30 տարի անկախ ենք եղել  և դուք միակ մարդն եք, որ մեր անկախությունը հարցականի տակ եք դրել։ Դուք մեր  անկախության թշնամին էլ եք, ինքնիշխանության թշնամին էլ եք։ Եվ մեր անկախությունն էլ,  ինքնիշխանությունն էլ պետք է փրկել նախ և առաջ ձեզանից։

Հարց չկար, չեմ ակնկալում որևէ անդրադարձ»,- ասաց ընդդիմադիր պատգամավորը։

Սակայն Աննա Գրիգորյանի ելույթին արձագանքեց Նիկոլ Փաշինյանը. «Նախ դուք պատմությունը լավ չգիտեք։ Հազարամյա  պատմության մեջ Արցախն առաջին անգամ չէ հայաթափվել։ Եթե պատմությունը մի քիչ իմանայիք, դա չէիք ասի, հետևաբար արձանագրելով, որ կարող ենք արձանագրել ձեր պատմության չիմացությունը, մնացած  հետևությունները համարում եմ այդ չիմացության հետևանք»։

Աննա Գրիգորյանը պատասխանեց. «Պատմության չիմացությունից դուք եք խոսո՞ւմ։ Ամբողջ հայ ժողովուրդն ականատես է եղել ձեր և Իլհամ Ալիևի բանավեճին, որտեղ  խայտառակ արձանագրումներ եք ունեցել Հայաստանի և  հայ ժողովրդի պատմության վերաբերյալ։ Գոնե դուք մի ասեք։ Ես հիմա  ձեզ նայում եմ  ու իսկապես հարց է առաջանում ինձ մոտ՝  ձեր ոգին փառավորվա՞ծ է այս իրականությամբ։ Դուք չե՞ք հասկանում, որ մեզանից յուրաքանչյուրը ու հայ ժողովրդի յուրաքանչյուր ներկայացուցիչ  ձեզանից բան պահանջելու ունի։ Ինչի՞ց եք նեղվում։ Լա՞վ եք զգում հիմա Արցախը չլինելով, թոթափեցի՞ք այդ բեռը։ Հիմա ամբողջ աշխարհին եք թշնամի դարձրել, երկու թշնամին  հերիք չէր, մի հատ էլ թշնամի եք  ձեռք բերում՝ անունը դնելով անկախության  ենք գնում։

Միակ  մարդը, որ  մեր անկախությանը հարցականի տակ է դրել, դա դուք եք։ Եթե չեք հավատում, եկեք ես ձեզ տանեմ Սյունիքի մարզի Կապան համայնքի Ներքին Հանդ գյուղ։ Երեք կողմից շրջապատված է թշնամիներով, ջրի բոլոր աղբյուրները  գտնվում են թշնամու վերահսկողության տակ, մարդիկ սեփական երեխաների ու ծնողների գերեզամանը չեն կարողանում գնալ։ Սա այն անկախությունն է, որը դուք եք բերել մեր ժողովրդին»։

Փաշինյանն ասաց. «Հերիք չէ էդ Սյունիքի մարզին, Կապանին, ստեղ -ընդեղին հղում անեք, էլի։ Այդ հղումների ճակատագիրն էլ տեսանք... Եկեք ձեզ տանեմ...  Հեսա կասեի, հա։ ... Մի հատ դուք հանգստացեք,  մյուս անգամ այդ բառապաշարով չկրկնեք»։

Փաշինյանը հեռացավ ամբիոնից, դահլիճում պատգամավորները սկսեցին գոռալ։ Ալեն Սիմոնյանը լռության կոչ արեց։