Ձեր վստահելի աղբյուրը

«Վերին Լարս» անցակետում Հայաստանից Ռուսաստան գնացող շուրջ 90 բեռնատար սպասում է հսկողության ավարտին․ ռուսական կողմը հայկական կոնյակի նկատմամբ իրականացնում է խիստ մաքսային հսկողություն։

Panorama.am-ի հետ զրույցում ՌԴ-ում ՀՀ դեսպանությանը կից մաքսային կցորդ Վահան Հակոբյանն ասաց, որ բեռների մի մասն արդեն զննել են, սպասում են փորձաքննության պատասխանին, մյուս մասին դեռ զննում են։

Նրա խոսքով՝ փորձաքննությունից  հետո բեռնատարները կոնյակը կարտահանեն Ռուսաստան, իսկ եթե խախտումներ հայտնաբերվեն, դրանք կվերադառնան Հայաստան։

Վահան Հակոբյանը նշեց, որ հայկական կոնյակի նկատմամբ հսկողությունը սկսվել է այս տարվա մարտ-ապրիլ ամիսներից, իսկ հոկտեմբերի 1-ից «Վերին Լարս»-ի անցակետում հսկողությունն ուժեղացվել է։
«Ռուսական կողմը դա պայմանավորում է նրանով, որ կոնյակի որակի հետ կապված  խախտումներ կան և ստիպված են սահմանին ավելի խիստ հսկողություն իրականացնել, որ անորակ կոնյակ չմտնի Ռուսաստան։ Ըստ ռուսական կողմի՝ բավականին հաճախ են նման խախտումներ հայտնաբերում»,- ասաց Վահան Հակոբյանը։

Նրա խոսքով՝  խնդրով զբաղվում են նաև ՀՀ էկոնոմիկայի նախարարությունը, ՊԵԿ-ը։

Մաքսային կցորդ նաև հայտնեց, որ Հայաստանից այլ ապրանքներով բեռնված բեռնատարները «Վերինի Լարս» մաքսային անցակետում նորմալ մաքսազերծվում են, այս պահին կուտակումներ չկան, բեռները միջինում 2-3 օրվա ընթացքում  անցնում են սահմանը։

Վահան Հակոբյանը միաժամանակ նշեց, որ Վերին Լարսում՝ ՌԴ-ից դուրս եկող ուղղությամբ, կան որոշակի կուտակումներ,  դրանց մեջ են նաև հայկական բեռնատարներ։ Դա կապված է ՌԴ կառավարության ընդունած նոր որոշման հետ, ըստ որի՝ հոկտեմբերի 1-ից ՌԴ-ից երրորդ երկրներ արտահանվող ապրանքների վրա սահմանվել են որոշակի մաքսատուրքեր։

«Դա Հայաստանին չի վերաբերում։  Պարզապես  նոր որոշում է, շատ տնտեսվարողներ տեղյակ չէին դրանից և փաստաթղթային, վճարման հետ կապված խնդիրներ են առաջացել, գործընթացը դանդաղել է։ Արդյունքում կան որոշակի կուտակումներ։ Սակայն հայկական բեռնատարներին հիմնականում տալիս են առաջնահերթություն և դրանք անարգել անցնում են սահմանը»,- ասաց Վահան Հակոբյանը։