Ձեր վստահելի աղբյուրը

«Գիտե՞ք, Ադրբեջանի կողմից ձերբակալվել են Փաշինյանի քաղաքական հակառակորդները»,-ԱԺ ճեպազրույցների ժամանակ պատասխանալով հնչած հարցին՝ ասաց ԱԺ «Հայաստան» խմբակցության պատգամավոր Արթուր Խաչատրյանը։

Նա նշեց, ձերբակալվածներն այն մարդիկ են, որոնք երբևէ Փաշինյանին քննադատել են։

«Նաև Արայիկ Հարությունյանն է, որն իր վրա վերցրեց Գանձակի հրթիռակոծումը, չնայած հիշեցնեմ, որ Արծրուն Հովհաննիսյանը Լուգանսկի օդանավակայանի լուսանկարն էր հրապարակել։ Նրանք քննադատել են Փաշինյանի քաղաքականությունը։ Ես պատահականություններին չեմ հավատում»,-ասաց ընդդիմադիր պատգամավորը։

Ճեպազրույցի մասնակից «Հայաստան» խմբակցության պատգամավոր Լիլիթ Գալստյանն էլ հիշեցրեց, երեկ իր գործընկեր Արծվիկ Մինասյանը ԱԺ եկած Փաշինյանին ասել էր, որ Բաքվի բանտում կեղեքվողներն ունեն ՀՀ անձնագրեր։

«Նիկոլ Փաշինյանը ոչ միայն դրժել, մերժել է Հայաստանի Սահմանադրությունը, որով Հայաստանը պատասխանատվություն ունի անվտանգային երաշխիքներ ստեղծելու, այլև նրանք Հայաստանի Հանրապետության քաղաքացիներ են, ունեն կապույտ անձնագիր։ Ի՞նչ պատասխան տվեց Փաշինյանը։ Զրո պատասխան»,-ասաց Գալստյանը։