«Ժողովուրդ». Նույնիսկ այս իրավիճակում որևէ մեկը չի կարող փաստել, թե Արցախի հարցը փակված է
«Ժողովուրդ» թերթը գրում է.
«Արցախի ժողովրդի ինքնորոշումը և արցախահայության ինքնորոշման անքակտելի իրավունքի ճանաչումը մշտապես եղել են ԼՂ հակամարտության կարգավորման և դրա շուրջ բանակցությունների անկյունաքարը: Իսկ ի՞նչ է Ազգերի ինքնորոշման իրավունքը. այն ժամանակակից միջազգային իրավունքի հիմնարար սկզբունքն է:
Համաձայն ՄԱԿ-ի կանոնադրության և Մարդու իրավունքների համաձայնագրի՝ ինքնորոշման իրավունքը հռչակվում է որպես միակողմանի գործողության հնարավորություն՝ ուղղորդված ժողովրդի ազատությանը և վարչական տարածքի որոշակի քաղաքական կարգավիճակին, առանց որևէ ենթատեքստի և սահմանափակման։
Արցախն իր ազատ ինքնորոշման իրավունքն իրացրել է 1991 թվականի անկախության հանրաքվեով: և չնայած որ Արցախի հանրապետությունը որևէ պետության կողմից ճանաչում չի ստացել, բայց այն մշտապես եղել է կայացած համակարգ ունեցող պետություն՝ իր դրոշով, հիմնով, օրենսդիր և գործադիր կառույցներով ու ամենակարևորը՝ ժողովրդավարական կառավարմամբ:
Արցախի ժողովրդի ինքնորոշումը և սրա շուրջ միջազգային կոնսենսուսի ձևավորումը բանակցային ողջ 30 տարիների ընթացքում եղել է հայկական կողմի առաջնահերթությունը: Բանակցային գործընթացը, թերևս, գլխիվայր շրջվեց 2020թ-ի 44 պատերազմից հետո, երբ հայկական կողմի բանակցային դիրքերն ամբողջությամբ խարխլվեցին:
Նիկոլ Փաշինյանի իշխանությունը հայտարարեց, որ որպես առաջնահերթություն այսուհետ դիտարկում են արցախահայերի անվտանգությունն ու իրավունքները, իսկ ինքնորոշման իրավունքն,առհասարակ, դուրս եկավ բանակցային խոսույթից:
Իսկ ահա վերջին տարիներին Հայաստանի իշխանությունները՝ վարչապետի և արտգործնախարարի մակարդակով, ամենաբարձր ամբիոններից հայտարարում էին, որ ճանաչում են Ադրբեջանի տարածքային ամբողջականությունը՝ Լեռնային Ղարաբաղը:
Այսպիսով, ՀՀ իշխանությունները միտումնավոր կամ անդառնալի սխալ թույլ տալով, կանաչ լույս վառեցին Ադրբեջանի ագրեսիայի և ռազմական գործողությունների համար, ինչի արդյունքում ունենք այսօրվա ցավալի իրավիճակը, երբ Արցախն ամբողջությամբ հայաթափված է, իսկ հունվարի մեկից արդեն, առհասարակ, կլուծարվի: Բայց չնայած ստեղծված այս իրավիճակին, ամեն ինչ դեռ կորած չէ և նույնիսկ հիմա Արցախի ինքնորոշման հարցը դեռ գոյության իրավունք կարող է ունենալ: Իսկ ինչու այս ուղղությամբ քայլեր չեն ձեռնարկվում:
«Ժողովուրդ օրաթերթ»-ը Արցախի ԱԺ պատգամավոր Մետաքսե Հակոբյանից հետաքրքրվել է, արդյո՞ք հավանական համարում է նույնիսկ այս պայմաններում ինքնորոշման իրավունքի հարցը օրակարգ բերելը, և ի՞նչ քայլեր են անում Արցախից բռնի տեղահանված պաշտոնյաները և պատգամավորները այս ուղղությամբ, արդյո՞ք պատրաստվում են ԱԺ նիստ հրավիրել այդ օրակարգով և հարց բարձրացնել.
«Նույնիսկ այս իրավիճակում որևէ մեկը չի կարող փաստել, թե Արցախի հարցը փակված է, Արցախ գոյություն ունենալ չի կարող, արցախցիները սփռվեցին աշխարհով մեկ, ամեն բան ավարտվեց: Հիմա, սակայն, այնպիսի մի փուլում ենք, երբ դեռ ինքնակազմակերպվում ենք, պետք է կարողանանք իրավիճակը սթափ և սառը գնահատել, որպեսզի յուրաքանչյուր քայլ հաշվարկված և իրականությունից բխող լինի: Այս փուլում որևէ բան չեմ բացառի, սակայն, ժամանակ է պետք այդ ամենը կազմակերպելու և հաշվարկված քայլեր անելու համար»,-ասաց Արցախի հանրապետության պատգամավորը»։
Մանրամասները թերթի այսօրվա համարում
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
