Ձեր վստահելի աղբյուրը

Պաղեստինյան արմատական ՀԱՄԱՍ կազմակերպության զինյալների կողմից Իսրայելի վրա հարձակումը իսրայելական հետախուզության ձախողումն էր, որը կարող է երկար տարիներ պահանջվել հասկանալու համար: ՏԱՍՍ-ի փոխանցմամբ, այս կարծիքը հայտնել է «The Washington Post»-ի (WP) արտաքին քաղաքականության հոդվածագիր Դեյվիդ Իգնեյշեսը։

Նա զինյալների հարձակումը համեմատում է 2001 թվականի սեպտեմբերի 11-ին ԱՄՆ-ում տեղի ունեցած ահաբեկչությունների շարքի հետ, հատկապես «դրան նախորդած զարմանալի կուրության» հետ։

Հոդվածագրի կարծիքով՝ «հետախուզության իրական ձախողումները գալիս են ոչ թե պարզապես տեղեկատվության պակասից, այլ այն հասկանալու անկարողությունից»: Իսրայելցի մասնագետները, կարծում է նա, «չէին հասկանում իրենց հակառակորդների հնարամտությունն ու վարպետությունը»։

Իսրայելցի վերլուծաբանները, կարծես, հաշվի չեն առել, որ ՀԱՄԱՍ-ի զինյալները կարող են պարապլանով լքել Գազայի «բարիկադավորված հատվածը», հավելել է նյութի հեղինակը: Իսրայելի իշխանությունները, շարունակել է նա, չեն կարողացել «գնահատել օդում, ծովում և ցամաքում միաժամանակ գործելու իրենց հակառակորդի ունակությունը»:

Իգնեյշեսը նշել է՝ իսրայելական հետախուզությունը նույնպես հաշվի չի առել, որ «ՀԱՄԱՍ-ը և նրա դաշնակիցները կարող են գաղտնիքներ պահել», որոնք կապված են հարձակման հետ: Բացի այդ, նշվում է հոդվածում, «հետախուզության ձախողումները սկսվում են ավելորդ ինքնավստահությունից»։

«ՀԱՄԱՍ-ի հարձակումը հետախուզության ձախողում է, որի վերլուծության համար Իսրայելից կարող են տարիներ պահանջվել», - ընդգծել է Դեյվիդ Իգնեյշեսը։

Միևնույն ժամանակ, նա նշել է՝ հարձակումից մի քանի ամիս առաջ թվում էր, որ «Իսրայելը, կարծես թե, մասերի է բաժանվում» հրեական պետության վարչապետ Բենիամին Նեթանյահուի դատական բարեփոխումների պատճառով։

Մեկնաբանը հայտարարել է, որ, իսրայելական հետախուզության ղեկավարության ներկայացուցիչների կարծիքով, «Նեթանյահուն ոչնչացնում է Իսրայելը՝ հարձակվելով նրա Գերագույն դատարանի վրա»: