Ձեր վստահելի աղբյուրը

«Հայաքվե» նախաձեռնությունը Ազգային ժողով է մուտքագրել օրինագիծ, որով առաջարկում է լրացումներ կատարել ՀՀ քրեական օրենսգրքում՝  Հայաստանի անունից Արցախն Ադրբեջանի մաս ճանաչող, ինչպես նաև Հայոց ցեղասպանությունը ժխտող պաշտոնատար անձանց համար պատիժ սահմանել 10-15 տարվա ազատազրկում։

Լրագրողների հետ զրույցում «Հայաքվե» նախաձեռնության համակարգող  Ավետիք Չալաբյանն ասաց, որ, բնականաբար, շատերի մոտ հարց է առաջանում,  թե Ադրբեջանի կողմից Արցախի օկուպացիայից, այնտեղ իրականացված  էթնիկ զտումներից հետո որքանով է  արդիական մնում այս  օրենքի նախագիծը։

«Մենք ասում ենք, որ ավելի քան արդիական է ու ունի հետևյալ բացատրությունը. այն, ինչ տեղի է ունեցել Արցախում, միջազգային  իրավունքի կոպտագույն խախտում է։ Արցախն իրականում հանդիսացել է միջազգային իրավունքի սուբյեկտ, երկար տարիներ, տասնամյակներ եղել է  բանակցային կողմ, եղել են Մադրիդյան սկզբունքներ, ուստի Արցախը որպես  միջազգային իրավունքի սուբյեկտ, չի կարող  պարզապես վերանալ էթնիկ զտման արդյունքում»,- ասաց Չալաբյանը։

Նա ընդգծեց, որ Հայաստանի որևէ իշխանավոր  իրականում իրավունք չունի իր որևէ գործողությամբ  ամրագրել Արցախում տեղի ունեցած ցեղասպան  գործողությունները. «Արցախում ցեղասպանություն է  տեղի ունեցել։ Այն, ինչ անում է այսօր Փաշինյանը, դա ցեղասպանությանը հանցակցություն և մաքրագործություն է։

Հայ ազգի այն ներկայացուցիչները, որոնք դեմ են դրան,  պետք է շարունակեն պայքարը, որպեսզի թույլ չտան Փաշինյանին Ադրբեջանի  ցեղասպանության արդյունքում ստեղծված իրավիճակը ամրագրել միջազգային պայմանագրերով։ Այն, ինչ արել է Փաշինյանը, ընդամենը հայտարարություններ են, միջազգային որևէ պայմանագիր  գոյություն չունի,  և մենք պայքարելու ենք նրա համար, որպեսզի այդպիսի միջազգային պայմանագիր գոյություն չունենա։  Եթե գոյություն ունենա նման միազգային պայմանագիր, առաջինը կվերացնի Արցախը որպես հայկական պետություն, միջազգային իրավունքի սուբյեկտ, երկրորդ՝  ճանապարհ կբացի ՀՀ նկատմամբ ագրեսիայի համար։

Եթե մենք ուզում ենք  կանխել հայ ժողովրդի  մասսայական ցեղասպանությանը և Հայաստանի  ինքնիշխանության կորուստը, այսօր մենք պետք է շարունակենք մեր պայքարը»։

Նա ասաց, որ այսօր պետք է վերախաղարկել այս իրավիճակը, վերականգնել  Արցախի Հանրապետության սուբյեկտայնությունը և դրա բոլոր ճանապարհները գոյություն ունեն, թույլ չտալ, որպեսզի Արցախում տեղի ունեցած ցեասպանությունն ամրագրվի ՀՀ պաշտոնյաների գործողություններով։

Չալաբյանը  նաև ասաց, որ Արցախի Հանրապետության նախագահ Սամվել Շահրամանյանի՝ Արցախի Հանրապետության գոյությունը դադարելու մասին հրամանագիրը հակասահմանադրական է, ստորագրվել է ուժի պարտադրանքով, բնակչության ֆիզիկական բնաջնջման վտանգի ներքո, ցակացած հրամանագիր ուժի մեջ է մտնում հրապարակումից հետո, իսկ այս հրամանագիրը հրապարակված չէ, որևէ մեկը չի տեսել այն. «Սամվել Շահրամանյանի հրամանագիրը, որին հղում է կատարվում, իրավական իմաստով առոչինչ փաստաթուղթ է, գոյություն չունի, նույիսկ հրապարակված չէ»։ 

Նա հայտարարեց, որ Արցախի բնակչությանը Արցախ վերադառնալու համար պետք է ստանա սեփական անվտանգության և իրավունքների պահպանման միջազգային երաշխիքներ։ 

«Ինչքան էլ այս գործող իշխանությունը փորձի Արցախի էջը փակել, փակված չէ, շարունակելու ենք պայքարը մինչև Արցախի  բնակչությունն իրավունք ստանա վերատիրել իր հայրենիքին, նույնիսկ եթե  հիմա ստիպված է հարկադրված լքել է։

Օրինակ, այնտեղ կարող է լինել միջազգային խաղաղապահ ուժեր, ՄԱԿ-ի կառավարման մանդատ, Լաչինի միջանցքի նկատմամբ լինի միջազգային վերահսկողություն։ Ըստ էության այն, ինչ պետք է անեին ռուս խաղաղապահները։ Երկու տարի որոշակի անվտանգության երաշխիքներ ապահովեցին, բայց հետո դե ֆակտո հրաժարվեցին ապահովելու այդ անվտանգության երաշխիքները։ Հիմա մենք պետք է պայքարենք, որ դա լինի ՄԱԿ-ի հովանո ներքո և այնպիսի երաշխիքներ, որոնք կապված չեն մեկ առանձին երկրի կամայականությունից»,- ասաց Ավետիք Չալաբյանը։ 

Նախագծի՝ ԱԺ մուտքագրումից հետո ի՞նչ է սպասվում 

Ա.Չալաբյանը մանրամասնեց, որ, ըստ օրենքի, ԱԺ նախագահը պետք է մուտքագրի օրենքի նախագիծը պետաիրավական հարցերի հանձնաժողովին, վերջինս կազմակերպի համապատասխան լսումներ, առաջարկների հավաքագրում, դրա հիման վրա պետաիրավական հանձնաժողովը պետք է իրականացի նախագծի քննարկում։ Ենթադրաբար պետք է տևի 1-1,5 ամիս։

«Հուսով եմ՝ այդ ընթացքում լուրջ փոփոխություններ տեղի կունենան,  որոնք ևս մեկ անգամ կհավաստեն, որ այն գործընթացը, որը մենք սկսել ենք, բացարձակ  արդիական է, լրացուցիչ կռվան է տալիս Հայաստանին, որպեսզի մենք  պաշտպանենք և մեր ինքիշխանությունը, և Արցախի բնակիչների բնական իրավունքները»,- ասաց «Հայաքվե» նախաձեռնության համակարգողը։ 

Նա նշեց, որ այն քննարկումները, որոնք տեղի կունենան ԱԺ-ում, իրականում ցույց կտան կողմերի դիրքորոշումները։ 

«Մենք համոզված ենք, որ եթե Ազգային ժողովի մեծամասնությունը դեմ քվեարկի այս նախագծին, դրանով նա հանցակից  կդառնա Արցախի ժողովրդի նկատմամբ տեղի ունեցած ցեղասպան գործողություններին։ Հիմիկվանից փորձում ենք հորդորել իրենց՝ մեկ անգամ ևս մտածել՝ իրենք պատրա՞ստ են այդ ճանապարհով գնալ, թե՞ ոչ»,- ասաց Ա.Չալաբյանը։