«Ժողովուրդ». Բաց է մնում միայն փոխքաղաքապետերի հարցը
«Ժողովուրդ» թերթը գրում է.
«Չնայած որ սեպտեմբերի 17-ին կայացած ընտրությունների արդյունքներով իշխանության թեկնածուն՝ Տիգրան Ավինյանն ընդամենը 33% ձայն էր հավաքել և չէր ընտրվել քաղաքապետ, բայց երեկ ավագանու ՔՊ և «Հանրապետություն» կուսակցութունների ձայներով Ավինյանն ընտրվեց քաղաքապետ: «Հանրային ձայն» կուսակցությունը եկավ և քվորում ապահովեց, բայց դեմ էր քվեարկել Տիգրան Ավինյանի թեկնածությանը:
Երևան քաղաքում տեղական ինքնակառավարման մասին օրենքի 47-րդ հոդվածի համաձայն` քաղաքապետը իր լիազորությունները ստանձնում է ընտրվելուց հետո` երրորդ օրացուցային օրը, ավագանու` օրենքի ուժով հրավիրված նիստում Երևանի բնակիչներին տրված երդմամբ։ Երևանի ավագանու հաջորդ նիստը կկայանա նոյեմբերի 21–ին` ժամը 10–ին։ Երեկվա նիստին նաև հանձնաժողների նախագահներ և փոխնախագահներ նշանակվեցին։
«Հանրապետություն»-ը ստացավ Ֆինանսավարկային և տնտեսական հարցերի մշտական հանձնաժողովի նախագահի և Մշակույթի, կրթության և սոցիալական հարցերի մշտական հանձնաժողովի նախագահի տեղակալի պաշտոնները, «Հանրային ձայն»-ը միայն Քաղաքաշինության և հողօգտագործման հարցերի մշտական հանձնաժողովի նախագահի տեղակալի պաշտոնը, մյուս բոլոր պաշտոնները ՔՊ-ինն են:
Այսպիսով՝ բաց է մնում միայն Տիգրան Ավինյանի տեղակալների՝ փոխքաղաքապետերի հարցը, որը կքննարկվի արտահերթ նիստով կամ էլ նոյեմբերի 21-ի հերթական նիստին: Ըստ «Երևան քաղաքում տեղական ինքնակառավարման մասին» օրենքի՝ քաղաքապետի տեղակալներին ներկայացնում է քաղաքապետը, նշանակում կամ ընտրում է Երևանի ավագանին։
«Ժողովուրդ» օրաթերթի տեղեկություններով՝ փոխքաղաքապետի պաշտոնին հավակնում են քաղաքապետի ԺՊ Լևոն Հովհաննիսյանը, որը Ավինյանի մտերիմն է քաղաքապետարանում, մյուս փոխքաղաքապետի հարցն էլ դեռ վաղուց է որոշված. այս պաշտոնում կնշանակվի Արմեն Փամբուխչյանը, որը քաղաքապետարանում Փաշինյանի «աչքն ու ականջն է»: Ի դեպ, Փամբուխչյանը «գործազուրկ» է դեռ հունիսի 30-ից՝ԱԻ նախարարության լուծարումից հետո:
Փաշինյանն էլ երկար փնտրտուքներից հետո նրա համար դեռ վաղուց պահել է փոխքաղաքապետի պաշտոնը: Փոխքաղաքապետերից մեկն էլ պետք է բաժին հասնի «Հանրապետություն» կուսակցությանը: Այս պահին թեժ քննարկումներ են գնում կուսակցության ներսում Արտակ Զեյնալյանի և Անի Խաչատրյանի թեկնածությունների շուրջ: ՔՊ-ն այդ պաշտոնը տալու է Արամ Սարգսյանի ղեկավարած ուժին,իսկ թե ու՞մ կառաջադրեն՝ Զեյնալյանին, թե ՝ Անի Խաչատրյանին, «Հանրապետություն»-ը դեռ քննարկում է այս հարցը»։
Մանրամասները թերթի այսօրվա համարում
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
