ԵԽԽՎ-ն Ադրբեջանին սպառնացել է՝ կվիճարկի հավատարմագրերը
ԵԽԽՎ-ն Ադրբեջանին կոչ է արել «ստեղծել վստահության մթնոլորտ և նյութական պայմաններ», որպեսզի Լեռնային Ղարաբաղի հայերը կարողանան վերադառնալ իրենց հայրենիք, այդ թվում ձեռնարկել ակտիվ քայլեր նրանց խրախուսելու այդ անելու համար։
ԵԽԽՎ խորվաթ պատգամավոր Դոմագոյ Հայդուկովիչի զեկույցի վրա հիմնված բանաձևում վեհաժողովը ափսոսանք է հայտնել «Ադրբեջանի իշխանությունների կողմից տարածաշրջանի հայ բնակչությանը վստահեցնելու իրենց անվտանգությունն ու իրավունքների լիակատար հարգումը երկարաժամկետ և շարունակական ձախողման համար»:
Խորհրդարանականներն ընդգծել են, որ ԼՂ գրեթե ողջ հայ բնակչությունը լքել է իր նախնիների հայրենիքը և փախել Հայաստան «ֆիզիկական անհետացման իրական վտանգի, Ադրբեջանում հայերի նկատմամբ ատելության երկարամյա քաղաքականության և նրանց հետագա վերաբերմունքի նկատմամբ անվստահության պատճառով»։
«Ադրբեջանի համար դեռ ուշ չէ իրավիճակը շտկելու և իր բարի կամքն ապացուցելու համար», - ասել են նրանք՝ նշելով Ադրբեջանի խոստումները հայ բնակիչների իրավունքների ու ազատությունների ապահովման, հայ բնակիչների վերաինտեգրման հետ կապված։
Վեհաժողովն ընդգծել է, որ տարածաշրջանից գրեթե ողջ հայ բնակչության զանգվածային արտագաղթը հանգեցրել է հիմնավոր կասկածների, որ դա կարող է լինել էթնիկ զտում։
Նշելով նման պնդումներն ու կասկածները հերքող Ադրբեջանի հայտարարությունները՝ ԵԽԽՎ-ն այդ երկրի իշխանություններին կոչ է արել «ջանք չխնայել գործով և խոսքով ապացուցելու, որ դա այդպես չէ»։
Ի թիվ այլ բաների, Վեհաժողովը նաև կոչ է արել Ադրբեջանին խուսափել անցյալի իրադարձությունների համար անհանդուրժողականության կամ վրեժխնդրության արտահայտություններից, պաշտպանել տարածաշրջանի հայկական մշակութային ժառանգությունը, ազատ արձակել Լեռնային Ղարաբաղի՝ կալանավորված բոլոր ներկայացուցիչներին, ինչպես նաև բոլոր հայ ռազմագերիներին, ինչպես նաև թույլ տալ ԵԽ ինստիտուտների ու մարմինների մուտքը տարածաշրջան։
Եթե Ադրբեջանը չկատարի իր պարտավորությունները, Վեհաժողովը նշել է, որ «այլ այլընտրանք չի ունենա, քան կոչ անել Նախարարների կոմիտեին և Խորհրդարանական վեհաժողովին համատեղ ընթացակարգ սկսել՝ ի պատասխան Ադրբեջանի կողմից իր կանոնադրական պարտավորությունների լուրջ խախտման և վիճարկել ադրբեջանական պատվիրակության հավատարմագրերը 2024 թվականի առաջին նստաշրջանում»:
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
