Ձեր վստահելի աղբյուրը

«Ուրարտու» ֆուտբոլային ակումբը վերջերս հանդես էր եկել Արցախի Հանրապետության տարածքը լքած ընտանիքների բարեկեցության համար 50.000-ից 100.000 ԱՄՆ դոլար հատկացնելու նախաձեռնությամբ, ինչպես նաև կոչ արել Հայաստանի Պրեմիեր լիգայի մյուս ակումբներին՝ Հայաստանի ֆուտբոլի ֆեդերացիայի գլխավորությամբ, միանալ նախաձեռնությանը։ «Ուրարտու» ակումբը հայտնում է, որ իրենց  նախաձեռնությանը միացել է «Նոա» ՖԱ-ն։

«Նախաձեռնությունից հրաժարված կազմակերպությունները՝

- Հայաստանի ֆուտբոլի ֆեդերացիա

- «Ալաշկերտ» ՖԱ

- «Արարատ» ՖԱ

- «Վան» ՖԱ

- «Վեստ Արմենիա» ՖԱ

- «Փյունիկ» ՖԱ

- «Շիրակ» ՖԱ

Շնորհակալություն ենք հայտնում «Նոա» ֆուտբոլային ակումբին մեր նախաձեռնությանը միանալու համար, և տեղեկացնում ենք, որ ակնկալվում է արձագանք նաև ՀՀ կառավարությունից՝ բանկային հաշվի տրամադրման և փոխանցված միջոցները կառավարելու համար պատասխանատու անձանց նշանակման վերաբերյալ։

Սպասում ենք նաև «Արարատ-Արմենիա» ֆուտբոլային ակումբի պատասխանին, որը, հուսով ենք, վերջնական որոշման մասին մեզ կտեղեկացնի մինչև հոկտեմբերի 16-ը»,- հայտնում են ակումբից։