Ձեր վստահելի աղբյուրը

«Ով այդպիսի փորձեր է անում, կներեք, բառիս համար, ղալաթ է անում։ Ամբողջ աշխարհն ասում է, թե ով է հանձնել և ինչպես են հանձնել»,- դատական նիստից հետո լրագրողներին ասաց ՀՀ երրորդ նախագահ Սերժ Սարգսյանը՝ պատասխանելով հարցին, որ Ձեր մարտական ընկերները գերեվածված են, ի՞նչ կարող եք ասել, մյուս կողմից էլ մեղավորության սլաքները դեպի նրանց են ուղղում, նաև դեպի Արցախի վերջին նախագահ։

Ս. Սարգսյանը նշեց, որ իրենք ամեն ինչ կարող են փորձել, բայց իրենց փորձերը միշտ չէ, որ հաջողությամբ են պսակվում։

«Ի՞նչ կապ ունեն նախկին նախագահները հանձնելու հետ։ Երկրորդ հանգամանքը. խորհրդարանով ընտրված վերջին  նախագահը ի՞նչ պետք է աներ։ Ընդհանրապես, մնացած փոքր բանակով, փոքր զինված ուժերով արդյո՞ք ի վիճակի էր Արցախը դիմակայել Ադրբեջանին։ Իհարկե, ի վիճակի չէր։

Այսինքն իրենց ցանկությունը ո՞րն էր, որ այդ մարդիկ մինչև վերջին մարդը կռվեի՞ն, զոհվեի՞ն, իսկ կանայք, երեխաներն էլ դառնային թուրքի փա՞յ։ Դա՞ է այդ մարդկանց ցանկությունը եղել»,- ասաց ՀՀ երրորդ նախագահը։