Ձեր վստահելի աղբյուրը

Բրյուսելում Շվեդիայի երկու քաղաքացի է սպանվել, իսկ երրորդը վիրավորվել է հարձակման հետևանքով, որը Բելգիայի դատախազությունը որակել է  ահաբեկչություն։

BBC-ն գրում է, որ Բրյուսելում անցկացվող Եվրո-2024-ի ընտրական փուլի Բելգիա-Շվեդիա ֆուտբոլային հանդիպումը դադարեցվել է։

Բելգիական լրատվամիջոցները հայտնում են, որ սպանված երկու անձինք եղել են Շվեդիայի հավաքականի ֆուտբոլային մարզաշապիկներով։ Շվեդ ֆուտբոլիստները ՈւԵՖԱ-ին ասել են, որ չեն ցանկանում խաղալ երկրորդ խաղակեսը, ինչին Բելգիայի հավաքականը համաձայնել է։

Բրյուսելում հայտարարվել է ահաբեկչության բարձր մակարդակ, քանի որ զինված անձը, ով կարծես ինքնաձիգ է ունեցել, մնում է ազատության մեջ:

Ֆրանսիայի նախագահ Էմանուել Մակրոնը, ով այցով գտնվում էր Ալբանիայում, ասել է.«Եվրոպան ցնցվել է»։

Դաշնային դատախազները ասում են, որ ահաբեկչության հետաքննություն է սկսվել Բուլվար դ'Իպրում տեղի ունեցած հրաձգության կապակցությամբ, որը գտնվում է «Քինգ Բոդուեն» մարզադաշտից 5 կմ հեռավորության վրա:

Դատախազի խոսնակ Էրիկ վան Դույզեն կոչ է արել հանրությանը «գնալ տուն և մնալ տանը այնքան ժամանակ, քանի դեռ սպառնալիքը վերացված չէ»:

Նա նշել է՝  մի տղամարդ, ով պնդում է, որ հարձակվողն է, սոցիալական ցանցերում տեսանյութում ասել է, որ իրեն ոգեշնչել է «Իսլամական պետություն» խմբավորումը:

Արաբերեն խոսող տղամարդն ասում է, որ հարձակումն իրականացրել է Աստծո անունից, և որ սպանել է երեք մարդու։ Տեսանյութն ու այլ հանգամանքներ ստուգվում են ոստիկանության կողմից։