Ձեր վստահելի աղբյուրը

«Հայաստանում ես ընդհանրապես խնդիր տեսնում եմ կալանքը որպես խափանման միջոց՝ չափազանց հաճախակի դեպքերում կիրառելու հետ կապված։ Կալանավորումը պետք է լինի այն խափանման միջոցը, որը պետք է կիրառվի բացառիկ դեպքերում»,- կառավարության մոտ լրագրողների հետ զրույցում ասաց ՀՀ ՄԻՊ Անահիտ Մանասյանը։

Անդրադառնալով կալանքի տակ գտնվող արցախցի Տաթևիկ Վիրաբյանին՝ նա նշեց, որ խափանման միջոցը կիրառվել է դատարանի կողմից. «Շատ ազատ չեմ և չեմ կարող շատ հանգամանքների մասին խոսել՝ նաև որպես ՄԻՊ և պաշտոնատար անձ»։

Նա նշեց,  որ ի սկզբանե տարատեսակ միջամտություն են իրականացրել Տաթևիկ Վիրաբյանի հետ կապված, մասնավորապես, առողջական վիճակի մասով, այց են իրականացրել նրան, ուսումնասիրել փաստաթղթերը, պահման պայմանները, պարզաբանումներ ստանալու պահանջով դիմել են իրավասու պետական մարմիններին։

«Իրավունքների հետ  կապված խնդիր արձաագրելու համար մեզ  այս պահին մնացել է ընդամենը ստանալ պետական իրավասու մարմիններից պարզաբանումներ։ Դրանք ամփոփելուց հետո, եթե  իրավունքի խախտման փաստ արձանագրվի, հրապարակային հանդես կգանք»,- ասաց Ա. Մանասյանը։

Հիշեցնենք, որ Տաթևիկ Վիրաբյանին ներկայացվել է զանգվածային անկարգության կոչեր հնչեցնելու և այդ անկարգություններին մասնակցելու մեղադրանք: Նա երկու ամսով կալանավորվել է։