Ձեր վստահելի աղբյուրը

«Ակադեմիական քաղաքը»  երաշխավորելու է ձեռք բերված գիտելիքի լավագույն կիրառությունը՝ ապահովելով հետազոտությունների գերազանցության, կիրառական արդյունքների հայտնաբերման, զարգացման և դրանց փոխանցման նորարարական գործունեության խթանման և մտավոր սեփականության պաշտպանության սկզբունքները՝ այդպիսով ծառայելով հանրությանը»,-կառավարության նիստում հայտնեց ԿԳՄՍ նախարար Ժաննա Անդրեասյանը՝ զեկուցելով քաղաքի կառուցման հայեցակարգը:

Նախարարի խոսքով՝ «Հայաստանի Հանրապետության կրթության մինչև 2030 թվականի զարգացման պետական ծրագրիրը հաստատելու մասին» օրենքով է նախատեսվում  «Ակադեմիական քաղաք»ի ստեղծումը :

«Ակադեմիական քաղաքի ստեղծման անհրաժեշտությունը պայմանավորված է լավագույն ստանդարտներին համահունչ և միջազգայնորեն մրցունակ բարձրագույն կրթություն և գիտություն ունենալու, ինչպես նաև այս երկու ոլորտներն արդյունավետ ինտեգրելու նպատակներով»,-հայտարարեց Անդրեասյանը:

Նախարարը նշեց, որ «Ակադեմիական քաղաք» ծրագիրն իրականացնելու նպատակով ապրիլի 21-ին ստեղծվել էր «Ակադեմիական քաղաք» հիմնադրամը:

«Աշխատանքների հետագա հստակեցման ու կանոնակարգման նպատակով էլ այսօր ներկայացնում ենք հայեցակարգը: Հայեցակարգով էլ սահմանվում են «Ակադեմիական քաղաք» ստեղծելու նպատակներն ու խնդիրները, Ակադեմիական քաղաքի կլաստերները, ուսանողների, դասախոսների, գիտնականների ու վարչական աշխատողների նախատեսվող թիվը, այն ենթակառուցվածքները, որոնք պետք է ապահովվեն «Ակադեմիական քաղաքում» և այլ պահանջներ»,-հայտարարեց ԿԳՄՍ նախարարը:

Նա հայտնեց, որ քաղաքը կառուցելու համար դիտարկվում է Երևանի 17-րդ թաղամասին հարող տարածքը, որի գերակշռող մասը պետական կամ համայնքային սեփականություն է, և Համո Բեկնազարյանի անվան «Հայֆիլմ» կինոստուդիայի տարածքը, որոնց գումարային մակերեսը կազմում է շուրջ 700 հեկտար:

Նախարարի խոսքով՝ Ակադեմիական քաղաքի տարածքները նախատեսվելու են այն տրամաբանությամբ, որ հնարավորություն ունենան ֆիզիկապես տեղակայելու մինչև 16 բուհ՝ մինչև 8 պետական խոշորացված բուհեր և մինչև 8 մասնավոր կամ միջազգային բուհ :

Նա նշեց, որ հայեցակարգում մանրամասն նկարագրված են 4 կլաստերները՝ տեխնոլոգիական, արվեստների, կրթական և սպայական. Իսկ նախատեսվող տեղամասերը հարում են միջպետական մեկ մայրուղու:

«Ակադեմիական քաղաքը մայրաքաղաքին է կապվելու նաև երկաթգծով, որի մի մասն արդեն իսկ անցնում է հիմնական տեղամասով: Նախատեսվում է, որ «Ակադեմիական քաղաքի» ներսում տեղաշարժը կունենա հատուկ կարգավորում՝ կազմակերպվելով հեծանիվներով, էլեկտրական տրանսպորտով և այլ եղանակներով: Ընդհանուր առմամբ այստեղ բնակվելու և աշխատելու է մոտ 44 հազար մարդ, և հարևանությամբ գտնվող համայնքային կամ մասնավոր սեփականության հողերի վրա անկանոն շինարարությունից խուսափելու նպատակով ձևավորվելու է ավելի ծավալուն տարածքի զարգացման պլան»,-հյտնեց Անդրեսյանը: