Ձեր վստահելի աղբյուրը

Խոլերայի բռնկումներ այս տարի գրանցվել են առնվազն 31 երկրներում, աշխարհում հիվանդանալու վտանգի տակ է մոտ 1 մլրդ մարդ: Այս տվյալները Ժնևում դիվանագիտական առաքելությունների ներկայացուցիչների առջև ունեցած ելույթում ներկայացրել է Առողջապահության համաշխարհային կազմակերպության (ԱՀԿ) գլխավոր տնօրեն Թեդրոս Ադանոմ Գեբրեյեսուսը:

«Այդ հիվանդությունը մենք վաղուց պետք է հաղթեինք, սակայն փաստացի այն աճում է», - ասել է ԱՀԿ ղեկավարը:

Նա ընդգծել է, որ խոլերայով հիվանդանալու մասին հաղորդումների թիվը 2022 թվականին կրկնապատկվել է 2021 թվականի համեմատ, իսկ «ընթացիկ տարում ավելի վատ կլինի»: Գեբրեյեսուսը հայտնել է, որ «առնվազն 31 պետություն 2023 թվականին խոլերայի բռնկումներ է ունեցել, և որ մեկ միլիարդ մարդ վտանգի տակ է»:

«Այժմ առավել մտահոգիչ են Բուրունդիում, Կամերունում, Կոնգոյի Դեմոկրատական Հանրապետությունում, Եթովպիայում, Տանզանիայում, Սուդանում, Սիրիայում  և Զիմբաբվեում բռնկումները», - շարունակել է գլխավոր տնօրենը: Աֆրիկյան մայրցամաքի հարավում «զգալի առաջընթաց է գրանցվել»  այս հիվանդության դեմ պայքարում, սակայն  «անձրևների սեզոնը մեծացնում է լուրջ բռնկումների վտանգը»:

«Հատկապես անհանգստացնում է այն փաստը, որ այն երկրները, որոնք տարիներ առաջ արմատախիլ են արել խոլերան, այս տարի բախվել են այդ հիվանդությանը»,- ասել է Գեբրեյեսուսը:

Նա միջազգային հանրությանը կոչ է արել 160 միլիոն դոլար հատկացնել այս հիվանդության դեմ պայքարելու համար։ «Եկել է ժամանակը գործելու այս կոչով՝ խուսափելու անհարկի մահերից»,- հայտարարել է համաշխարհային կազմակերպության գլխավոր տնօրենը։