Ձեր վստահելի աղբյուրը

Ադրբեջանի և Հայաստանի միջև հակամարտությունը հիմնականում լուծվել է, այժմ կողմերին մնում է միայն հետագա գործնական քայլեր ձեռնարկել հարաբերությունները լիովին կարգավորելու համար։ Այս մասին լրագրողներին ասել է ՌԴ ԱԳ նախարար Սերգեյ Լավրովը Հարավային Կովկասի հարցով «3+3» ձևաչափով նախարարների հանդիպման արդյունքներով տված ճեպազրույցում։

«Հակամարտությունը մեծ մասամբ լուծված է, երկու կողմերն էլ համակարծիք են եղել, որ Ղարաբաղը պատկանում է Ադրբեջանին, և դա հիմնական չլուծված խնդիրն էր»,-եզրափակել է ՌԴ ԱԳ նախարարը և հավելել «Այժմ, իհարկե, մնում են գործնական քայլեր հարաբերությունները լիովին կարգավորելու համար, առաջին հերթին խաղաղության պայմանագիր նախապատրաստելը, սահմանների սահմանազատում և առանց խոչընդոտների տրանսպորտային տնտեսական կապերի հաստատում, ինչի մասին պայմանավորվել են Ռուսաստանի, Ադրբեջանի և Հայաստանի նախագահների հանդիպումներում»։

ՌԴ ԱԳ նախարարը նաև պարզաբանել է, որ հայ-ադրբեջանական հարաբերությունների այս ասպեկտները ուղղակիորեն չեն քննարկվում 3+3 ձևաչափում:

Սակայն, ըստ Լավրովի, 3+3 ձևաչափի հարթակն ինքնին նվիրված է դրական միտումների զարգացմանը՝ պայմաններ ստեղծելով ողջ տարածաշրջանի կայուն զարգացման համար, հետևաբար այն օբյեկտիվորեն օգնում է լուծել Ադրբեջանի և Հայաստանի միջև հարաբերություններում մնացած խնդիրները։

Լավրովի խոսքով՝ Բրյուսելն ու Վաշինգտոնը շարունակում են փորձել ներթափանցել Հայաստանի և Ադրբեջանի միջև սահմանի սահմանազատման գործընթաց։

«Վերջին մեկ տարվա ընթացքում փորձեր են եղել (շարունակվում են) ներթափանցել սահմանազատման գործընթաց նախ և առաջ Եվրամիությունից և որոշ չափով նաև Միացյալ Նահանգներից»,-ասել է ՌԴ դիվանագիտական գերատեսչության ղեկավարը և շարունակել. «Մենք դեմ չենք որևէ շփումների, որոնք օգտակար են համարում և՛ հայերը, և՛ ադրբեջանցիները»։

Նախարարը նաև հիշեցրել է, որ Մոսկվայի, Բաքվի և Երևանի միջև առանձին համաձայնագիր է նվիրված ադրբեջանա-հայկական սահմանի սահմանազատման հարցին։

«Նրանք՝ հայերն ու ադրբեջանցիները, պայմանավորվել են ստեղծել սահմանազատման հանձնաժողով, որի աշխատանքներին իրենց համաձայնությամբ ռուսական կողմը կմասնակցի որպես խորհրդատու։ Ցավոք, այդ հանձնաժողովը բավական երկար ժամանակ չի հավաքվել»,-հավելեց նա։

Մոսկվան պատրաստ է փաստացի օգնել Ադրբեջանի և Հայաստանի միջև սահմանի սահմանազատման գործընթացի մեկնարկին, ասել է Լավրովը։

«Բոլոր փորձագետները քաջ գիտակցում են, որ այն ամենը, ինչ անհրաժեշտ է սահմանազատումը քննարկելու և համաձայնեցնելու, այդ թվում՝ նախևառաջ խորհրդային ժամանակներից մնացած քարտեզները, գտնվում է Ռուսաստանի Դաշնությունում։ Գործընկերները դա հասկանում են։ Մենք չենք փորձում դրանից մեծ խնդիր սարքել: Եթե ցանկանան, թող իրենց բախտը փորձեն Բրյուսելում, բայց մենք միշտ պատրաստ ենք իսկապես օգնել սկսելու իրական սահմանազատում»,-ասել է ՌԴ ԱԳՆ-ի ղեկավարը: