Ձեր վստահելի աղբյուրը

Ֆերմեր, գործարար Հարություն Մնացականյանը ֆեյսբուքի իր էջում գրել էր.

«Մի կարևոր իրադարձության մասին խոսեմ, ոնց հասկացա մեր լրատվականները տեղյակ չեն։ Այսօր Իրանի առևտրային պալատի ներկայացուցիչ Քամբիզ Միրկազեմին հայտարարություն է տարածել , որ մինչև տարվա վերջ վերացնելու են Իրանի, ՌԴ-֊ի , ՀՀ֊-ի  և Բելառուսիայի միջև ապրանքների ներմուծման մաքսատուրքերը և կարողանալու ենք բոլորս մեր արժույթով առևտուր անել միմյանց հետ»։

Panorama.am-ը Հարություն Մնացականյանից հետաքրքրվեց, թե վերոնշյալ որոշումն ի՞նչ ռիսկեր է պարունակում Հայաստանի համար:

Հ. Մնացականյան-Բացասական հետևանքն  այն է, որ մեր գյուղատնտեսության համար է շատ դժվար լինելու, որովհետև պարսկական՝ առանց այն է էժան ապրանքը, մաքսատուրք չվճարելով, ավելի մրցունակ է դառնում, քան հայկականը: Այն վերաբերում է նաև թեթև արդյունաբերությունից մինչև կենցաղային բազմաթիվ այլ ապրանքներին:

Հնարավորությունները հումքերի հետ են կապված, քանի որ մեզ մոտ հումքերի գները կեժանանա, իսկ Պարսկաստանը հումք արտահանող շատ մեծ երկիր է: Հայաստանի տնտեսությունն իր հումքային պահանջարկը բավարարում է հիմնականում պարսկական շուկայից:

Panorama.am-Այդ որոշումն ի՞նչ ազդեցություն կունենա բենզինի շուկայի վրա:

Հ. Մնացականյան-Պարսկաստանը մինչև վերջին տարիները նույնպես բենզին ներկրող երկիր է եղել, բարտեր էր անում բենզինի հետ և սուբսիդավորում էր դրա գները: Այնտեղ  բենզինի արժեքը մոտավորապես 40  դրամ է, և հստակ արգելք էր դրված բենզինի արտահանման վրա, դրա համար պարսկական բենզին մինչև վերջին տարիները Հայաստան չէր գալիս:

Նախորդ տարվանից տեղյակ չեմ, հնարավոր է, որ ինչ-որ բան փոխված լինի, բայց եթե բենզին էլ ներմուծենք՝  պարսկական տեղական շուկայի գներով չենք կարող ներմուծել, քանի որ պետական սուբսիդիայի արդյունքում է բենզինն այնտեղ այդքան էժան:

Panorama.am-Պարսկական էժան ցեմենտի դեպքում ՀՀ գործադիրը կիրառեց սահմանափակող միջոցներ, որպեսզի հայկական արտադրողները մրցունակությունը չկորցնեն, հնարավո՞ր է նույնը նաև գյուղմթերքների մասով:

Հ. Մնացականյան-Ցեմենտի դեպքում հնարավոր է պետությունը ինչ-որ գործիքներ օգտագործի, բայց գյուղմթերքների մասով՝ կասկածում եմ: Պարսկական գյուղմթերքը դուրս է գալիս հիմնականում ՌԴ: Ես ներկայում գտնվում եմ Ռուսաստանում և այսօր գնացել էի գյուղմթերքի շուկա: Չեք պատկերացնի, թե ինչքան է շատացել պարսկական գյուղմթերքի մասնաբաժինը, նախկինում այդքան չկար: Այս տարի նաև իսրայելական պատերազմն ավելի մեծ խթան է հանդիսանալու պարսկական գյուղմթերքի արտահանման համար, քանի որ նախկինում սմբուկ, գունավոր պղպեղ և այլ ջերմատնային գյուղմթերքն ուղիղ Իսրայելից էր ներմուծվում, հիմա պատերազմի հետ կապված այդ ապրանքների անբավարարություն կա: Այս տարի Թուրքիայի երկրաշարժն էլ բավականին դրական ազդեցություն ունեցավ Պարսկաստանի տնտեսության վրա և մեր հարևանը շատ մեծ թափով փորձում է գրավել ՌԴ-ի և ԵԱՏՄ-ի շուկաները: Այս որոշումը՝ մաքսային դրույքաչափերի 0-ացումը մեծ խթան կհանդիսանա աելի մեծ չափաբաժին ապրաննքերով, հումքով գյուղմթերքով, կենցաղային քիմիայով մտնել ռուսական և ԵԱՏՄ հսկայական շուկա:

Զրուցեց՝ Ա. Վարդանյանը: