Ձեր վստահելի աղբյուրը

«Այսօր ճանապարհի կառուցման պայմանագրի տրանշներից մեկը ստորագրվեց և շուտով գործարկվելու է շինարարությունը»,-ՏԿԵ նախարար Գնել Սանոսյանի հետ համատեղ ասուլիսում հայտնեց  Իրանի ճանապարհների և քաղաքաշինության նախարար Մեհրդադ Բազրփաշը՝ անդրադառնալով Հյուսիս-Հարավ միջանցքի առաջին հատվածի կառուցմանը։

Նրա խոսքով՝ ճանապարհի այդ հատվածը ամենադժվար հատվածներից մեկն է հանդիսանում, իսկ Իրանի կառավարության դերն այն է, որ աջակցի իր շինարարական ընկերություններին՝ ներկա գտնվեն արտասահմանյան շուկաներում:

«Հայաստանը կարող է առանցքային դերակատարություն ունենալ Հյուսիս-Հարավ միջանցքի շրջանակներում: Երկու երկրներն էլ կոնսենսուս ունեն այդ միջանցքի կառուցման հետ կապված»,-ասաց իրանցի նախարարը և շեշտեց, որ ծրագրի գումարը մոտ 200 մլն դոլար է:

Հայտնելով, որ Հայաստանը չափազանց կարևորում է Հյուսիս-Հարվ ճանապարահատվածում ակտիվ աշխատանքների մեկնարկը՝ ՀՀ ՏԿԵ նախարար ԳՆել Սանոսյանն ասաց. «Փաստացի, սա Երևանից մինչև Իրանի սահման առաջին հատվածն է, որը շուտով շինարարության փուլ կմտնի, ինչի համար շատ ուրախ ենք, նաև ուրախ ենք, որ համագործակցությունը իրականական գործընկերների հետ հաջողվեց և իրանական ընկերությւոնները կիրականացնեն ճանապարհի այդ հատվածի շինարարությունը»:

Սանոսյանը տեղեկացրեց, որ 32 կմ ճանապարահատվածն ունենալու է մի քանի կամուրջներ և թունելներ, իսկ ֆինանսավորումն իրականացվելու է ՀՀ բյուջեից համաֆինանսավորմամբ և Եվրասիական զարգացման հիմնադրմաը կտրամադրի վարկային միջոցներ:

Բազրփաշը նաև հայտնեց, որ խոսել են նաև ճանապարավճարների մասին և ինչքան դրանք նվազեցնեն և զրոյացնեն՝ ապրանքներն այդքան էժան կհասնեն վերջնական սպառողին:

«Մենք այդ հարցում լավ քննարկում անցկացրեցինք, պայմանավորվածություն ձեռք բերեցինք, որ այդ ճարները հասցնենք 0-ի և պարոն նախարարը խոստացավ, որ օրենսդրական համապատասխան գործընթացները կիրականացվեն Հայաստանում»,-հայտնեց Իրանի ճանապարհների և քաղաքաշինության նախարար:

Գնել Սանոսյանն էլ բացատրեց, որ տրամաբանությունն այն է, որ  երկրների բեռնատարների՝ հարևան երկրների տարածք մուտք գործելիս և տարանցում իրականացնելիս վճարները 0-յացնեն և թույլ տան, որ տնտեսության այդ ուղղությունը զարգանա:

Իրանցի նախարարը հայտնեց, որ քննարկվել է նաև Արաքս գետի վրա երկրորդ կամրջի կառուցման հարցը, քանի որ գործող կամուրջը շատ հին է և թողունակությունը՝ քիչ: Նրա խոսքով՝ պայմանավորվածություն է ձեռք բերվել ձևավորել աշխատանքային խումբ այդ կամրջի կառուցման համար:

Մեհրդադ Բազրփաշը տեղեկացրեց, որ հանդիպմանը քննարկվել են նաև Հայաստանի դպրոցաշինության և բնակարանաշինության ոլորտում համագործակցության հարցեր:

«Հայ-իրանական հարաբերությունները շատ ջերմ են, բավական ակտիվ զարգանում են, բայց կարևոր է նաև տնտեսական կոմպոնենտները և մենք փորձում ենք նաև համատեղ փոխգործակցությամբ տնտեսական փոխգործակցություն ու ակտիվությունը մեծացննել»,-ասաց Գնել Սանոսյանը և հավելեց, որ հագեցած օրակարգով են պարսիկ գործընկերները ժամանել Հայաստան և արդյունավետ քննարկումներ են տեղի ունեցել: