Ձեր վստահելի աղբյուրը

«Նախորդ քառօրյայում աստեղից ինչ-որ մեկը ոսկեղենիկ հայերենով «ով ես դու, վաբշե» ասաց: Ինձ էր ասում, կարծեմ»,-ԱԺ հայտարարության ժամին ասաց «Հայաստան» խմբակցության պատգամավոր Աղվան Վարդանյանը՝ ակնարկելով Նիկոլ Փաշինյանին:

Հայտնելով, որ ինքը Աղվան Վարդանյանն է՝ պատգամավորը հավելեց, թե, որպեսզի դրանում Նիկոլ Փաշինյանը չկասկածի, ինքը որոշել է ԱԺ ամբիոնից իր գրած բանաստեղծություննրը կարդալ:

Նա երկու բանաստեղծություն-հայտարարություն կարդաց, որոնցից մեկը 1987  թվականի  է գրել՝ կարծելով, թե կոմունիստական նոմենկլատուրայի մասին է, բայց  հետո պարզվոլ է, որ միայն նրանց մասին չէ:

Դառնագիր

Պնակալեզ պատեհապաշտ, բ…ի տղերք,

Անհայրենիք, անսրբություն, անաղուհաց,

Ոչինչ մաքուր չմնաց, որ չպղտորեք՝

Ձեր արածը հիմա պիտի գա ձեր դիմաց:

Գալու է՝ ձեր զավակների պատկերն առած,

Որ քշվելով՝ Ձեր ավերից խեղված ու բութ,

Անեծքով են օրհնելու ձեր սաղմը սառած,

Որ դռնեդուռ մուրալու են ներում ու գութ:

Մուրալու են՝ չեն գտնելու լույսի մի շերտ

(Դուք չեք թողել, իսկ նա ինքնին չի բազմանում),

Եվ ձեր որդիք ամեն անգամ երբ ձեզ հիշեն,

Ձեր աճյունը պղծվելու է գերեզմանում:

Վարդանյանը հայտնեց, որ երկրորդ բանաստեղծությունը գրել է չարաբաստիկ 2018 թվականի հուլիսին:

«Հականերբող

Զուսպ մնա,- ասաց,- զսպաշապիկ

Հագցրու զքեզ, մինչև բանա

Քարտեզագիրը ձեռքի ափի

Հեղափոխության խաթաբալան։

Ինչե՞ր են գրված, ո՞վ է գրել՝

Նա չի կարդալու, ջնջող է նա,

Դեռ ինչեր պիտի պարտագրեն,

Մինչև սափրվի ու լողանա։

Արյուն եմ տեսնում, նզովք ու թույն,

Տեսնում եմ մահվան սև պատարագ.

Սերմանելու է ամայություն

Հրեշտակակերպ այս սատանան…

Կատարվելու է գրվածը մութ՝

Դառը գավաթն այս պիտի ըմպես,

Բայց երբ խաղաղվի ամբոխը բութ,

Զուսպ մնա։ Սակայն չվրիպես»,-արտասանեց Աղվան վարդնայանը և հավելեց. «Խնդրում է թեթև նայել, որպես զուտ բանաստեղծություն՝ անձնական՝ ոչինչ»: