Ձեր վստահելի աղբյուրը

«Ինձ համար հոկտեմբերի 27-ը բացահայտված է։ Ամեն ինչ քրեական գործի նյութերում է»,- «Եռաբլուր» զինվորական պանթեոնում լրագրողներին ասաց ՀՀ զինվորական նախկին դատախազ, ՀՀ գլխավոր դատախազի նախկին տեղակալ Գագիկ Ջհանգիրյանը։

Նա նշեց որ հիմա  վերսկսվել է նախաքննությունն անջատված մասով, այսօր էլ դատախազությունը հաղորդագություն է  տարածել, պետք է սպասել արդյունքների։

«Կատարվում է ակտիվ նախաքննություն։ Ինձանից որևէ տեսակետ, գնահատական, միտք, դատողություն հարցնելը սխալ կլինի, որովհետև այս կամ այն կողմից կարող են դա դիտարկել որպես միջամտության նախաքննությանը, գնահատական նախաքննությանը»,- ասաց նա։

Ջհանգիրյանը հիշեցրեց, որ անջատված մասը վերաբերում է հնարավոր  օժանդակողներին, դրդիչներին, կազմակերպիչներին, այլ չբացահայտված խմբի անդամներին։ 

«Վստահ եմ՝ հիմա որևէ պետական մարմին չի խոչընդոտում նախաքննությանը, ընդհակառակը, նաև մեր հայաստանյան իրավիճակը նպաստավոր է,  սպասենք քննության ավարտին»,- ասաց նա։

Հարցին՝ ինչպե՞ս եք գնահատում Հայաստանում ժողովրդավարության, արդարադատության մակարդակը, նա պատասխանեց. «Կարծում եմ բազմաթիվ հանցագործներ կան, որոնք դեռ նստած չեն, որոնք պետք է բանտում լինեին։ Այդպես եմ գնահատում»։ 

Լրագրողների շատ հարցեր մնում էին անպատասխան։

«Հոգնեցրիք ինձ»,- ասաց նա՝ լրագրողներին։

«Մենք ձեզ ամեն օր չենք տեսնում, պարոն Ջհանագիրյան»,- արձագանքեց լրագրողների մեկը։

«Ավելի լավ, գիտեք թե ես այդ վշտին չեմ դիմանում, որ ինձ չեք տեսնում»,- ասաց Ջհանգիրյանը։