Ձեր վստահելի աղբյուրը

«Շատերը գիտեն, թե ինչպես է Սպարապետ Վազգեն Սարգսյանը վերաբերվել Նիկոլ Փաշինյանին։ Փաշինյանը պետք է լավ հիշի, թե հայոց փառապանծ  բանակի հասցեին զրպարտություններ հրապարակելու համար ինչ որակումների էր արժանացել Վազգեն Սարգսյանից»,-«Եռաբլուր» զինվորական պանթեոնում լրագրողների հետ զրույցում ասաց ԱԺ «Պատիվ ունեմ» խմբակցության ղեկավար Հայկ Մամիջանյանը։

Նա նշեց, որ սրբապղծություն է, երբ Փաշինյանը փորձում է իրենց ու Սպարապետի գաղափարների միջև զուգահեռներ տանել։ Մամիջանյանի խոսքով, ամեն անգամ զարմանում եմ, թե ինչքան կարելի է «քաղաքականության խաթր զզվելի արշավներ անել»։

Հարցին՝ «հոկտեմբերի 27»-ի առանձնացված մասի վերաբացումն ի՞նչ նպատակ ունի՝  հանրության ուշադրությունը շեղելու համար է, թե՞ կարող է ինչ-որ իրադաձությունների վրա լույս սփռել, Հ.Մամիջանյանը պատասխանեց. «Այս իշխանությունները ունակ են ցանկացած ոճրագործություն, արհավիրք, ցանկացած ծանր, դառը, ցավոտ իրադարձություն փորձեն օգտագործել իրենց կեղտոտ խաղերի համար։ Իրենք երբեք ոչ մի դեպքում հետաքրքրված չեն արդարադատության, իրականության, որևէ ճշմարտ բան բացահայտելու մեջ։ Իրենց դա չի հետաքրքրում, այլ հետաքրքրում է իրենց իշխանությունը, աթոռը պահելը, մի քանի հայի ավելի շատ խաբելը, որպես արդյունք մեր երկրի համար ավելի մեծ վտանգ ստեղծելը։Ես այս հարցում իրենցից որևէ ակնկալիք չունեմ»։