Ձեր վստահելի աղբյուրը

«Հայկական երկրորդ հանրապետության ներկայացուցիչները փաստաթղթեր են ստորագրել, լուծարել են այդ հանրապետությունը, այլ երկրների հետ հարաբերության մեջ են մտել։ Հիմա էլ ասում եք՝ ինչո՞ւ չի ընդունում, ո՞ւմ ընդունի»,-պտասխանելով Արցախի Հանրապետության գործող նախագահ Սամվել Շահրամանյանի հետ Փաշինյանի՝ չհանդիպելու մասին հարցին՝ ԱԺ-ում հայտարարեց ՔՊ-ական Արմեն Խաչատրյանը։

Նա հավաստիացրեց, որ Փաշինյանը շատ մարդու չի ընդունում, ժամանակ չի ունենում, իրեն էլ երբեմն չի ընդունել։

Հայտարարելով, թե այլ երկրի տարածքում մեկ այլ տարածքային սուբյեկտի իշխանություն չի կարող գործել՝ Խաչատրյանն ասաց. «Նման բան չի եղել, վտարանդիր իշխանություն եղել է դարեսկզբին, երբ ռուսական ցարական իշխանությունն ամեն մի տեղ ցար ուներ։ Արցախը Ադրբեջանի կազմում ճանաչումը միջազգային ընդունված իրավական փաստ է, և որևէ նորմալ պետություն չի կարող որևէ բան ասել, բայց դրանով չի նշանակում, որ պետք է ոտնահարվեին Արցախի ժողովրդի իրավունքները։ Այսօր ունենք 100 հազար բռնի տեղահանված և ամեն ինչ անելու ենք նրանց իրավունքները ապահովելու համար: Ժամանակի ընթացքում կորոշեն՝ քաղաքացիություն ուզո՞ւմ են, թե՞ ոչ, բայց տեղահանվածի կարգավիճակ կմնա, դա փաստագրում է»։

Նա նաև հայտարարեց, թե ամեն ինչ արվելու է, որ արցախցիների հետ վերադարձի, գույքային իրավունքները պահպանվեն, քանի որ նրանք այնտեղ ահռելի քանակությամբ գույք են թողել և իրավունք ունեն վերադառնալու իրենց հայրենի երկիրը։

«Ինչպես եք պատկերացնում, պատերազմից հետո տարածաշրջանում ՀՀ-ն հայտարարում է, որ անկախության ենք գնում, որովհետև ամենաշատը մեզ է պետք դա, հետո հայտարարի՝ ես չեմ ճանաչում Ադրբեջանի տարածքային ամբողջականությունը, տարածքներ կան, որ մերնն են, մենք հետո գալու ենք վերցնելու, օրեր հետո պատերազմ կլիներ։ Դե յուրե ամբողջ աշխարհը ճանաչում է, որ ԼՂ-ն Ադրբեջանի տարածք է, եթե այդպես չէ, ապա ումի՞ց էինք փրկում, ինչի՞ց էինք ինքնորոշում»,-հայտարարեց ՔՊ-ական պատգամավորը։