Ձեր վստահելի աղբյուրը

«Այս գործն աբսուրդ է։ Այն սարքված է ոչ մի բանի վրա»,-դատական նիստի ավարտից հետո հայտարարեց «Քաղաքացիական գիտակցություն» ՀԿ նախագահ Նարեկ Սամսոնյանը։

Նրա խոսքով, գործը հարուցվել է որևէ ձևով իրեն վնասելու համար։

«Տասնյակ անգամներ անհիմն բերման են ենթարկել ինձ։ Այս ամենի մեջ ես ամենափոքր վնասը կրած մարդն եմ։ Իմ ընկերների մեծ մասն այսօր նստած են՝ Տաթև Արցախը, Նարեկ Մալյանը, Լևոն Քոչարյանը, Արմեն Աշոտյանը... Ինչի՞ համար են նստած արցախցի անչափահաս տղան, Տաթև Արցախը, որ երեկ ուշագնաց է եղել »,-ասաց Սամսոնյանը։

ՀԿ նախագահն ասում է՝ իրեն էլ մի օր կազատազրկեն, դրան պատրաստ է։

«Այս ամենի վերջն ազգադավների իշխանազրկումն է լինելու,  այլ ոչ մի բան։ Եթե այս խայտառակության, ամոթի, դավաճանության իշխանությունը չհեռանա, բոլորն են հայտնվելու դատարաններում»,-նշեց նա։

Անդրադառնալով  քաղաքական դրդապատճառներով ազատազրկումների դեպքում միջազգային  կառույցների լռությանը՝ ՀԿ նախագահն ասաց, դրանք ապագայում իրենց համար են խնդիրներ ստեղծում։

«Այդ կառույցները այլևս մաշեցրել են այն գաղափարական ու փիլիսոփայական ողջ զինանոցը, վստահությունը, որ ունեին։ Այդ կառույցները մեր երկրում գլուխները կախ են ման գալու, երբ կլինի իշխանափոխություն։ Իրենց պատկերացմամբ ժողովրդավարության փարոսն այս այլանդակությունն է։ Ոչինչ, ես ամերիկացիներին ցանկանում եմ, որ նման ժողովրդավարության փարոս լինի իրենց երկրում»,-ասաց Սամսոնյանը։

Այսօրվա դատական նիստում հայտնի դարձավ, որ փոխվել է գործով մեղադրող դատախազը։

Անդրադառնալով նիստի ընթացքում դատախազի հնչեցրած առաջարկին, որ Սամսոնյանը կարող է հանցագործության մասին հաղորդում ներկայացնել՝ նա նշեց, որ բազմաթիվ օրինակներ կան ՝ «Ռուբեն Մեհրիբանի, Վահագն Ալեքսանյանի, Անդրանիկ Քոչարյանի օրինակները ես նշեցի, նրանք բռնության կոչեր են արել»։ 

«Ես զարմացա դատախազի առաջարկից։ Սրանց ես ի՞նչ հաղորդում տամ։ Հանցագործներին հանցագործության մասին հաղորդո՞ւմ են տալիս, ես ո՞ւմ հանցագործության մասին հաղորդում տամ»,-ասաց նա՝ ընդգծելով, որ Հայաստանում արդարադատությունն ամբողջությամբ տապալված է, գոյություն չունի։

Մեղադրական եզրակացության համառոտ բովանդակության համաձայն,  Նարեկ Սամսոնյանին մեղադրանք է առաջադրվել այն բանի համար, որ նա տեղեկատվական տեխնոլոգիաների օգտագործմամբ, քաղաքական հայացքներով պայմանավորված հանդես է եկել բռնություն գործադրելու հրապարակային կոչով, հրապարակայնորեն արդարացրել է բռնությունը:

«Այսպես.
01.04.2023թ. «AntFake.am» կայքում հրապարակվել է ««զարկեց ճակտին, փռեց գետնին», ում պռոեկտն է էդգար Ղազարյանը. «իմնեմնիմի» փոդքասթ #05»», վերտառությամբ տեսագրությունը, որում առկա են բռնության կոչ ու բռնության արդարացում, որով Նարեկ Սամսոնյանը պատգամավորներին հորդորում է հետևել պատգամավոր Մհեր Սահակյանի օրինակին, մասնավորապես նշելով, որ «Կատաղած շանը կանխելու համար կան ոչ ֆիզիկապես սպանելու օրինակներ»: Մասնավորապես, հաղորդման ընթացքում Նարեկ Սամսոնյանի կողմից հնչեցվել են հետևյալ արտահայտությունները' «Ես ուզում եմ ասել, որ ես աջակցում եմ Մհերին, Մհերի արածը ողջունում եմ, բավականին բարձր եմ գնահատում Մհերի արածը, որովհետև Մհերը արել է մի բան, ինչը վաղուց պետք էր անել և ինչը ընդհանրապես պետքա հաճախ անել» և «ես շուտափույտ ազատություն եմ մաղթում Մհերին, ողջունում եմ նրան, տոկունություն եմ մաղթում և հորդորում եմ մնացած պատգամավորներին, ևս հետևել Մհեր Սահակյանի օրինակին: Թույլ մի տվեք շները Ձեր վրա հարձակվեն և կծեն: Կատաղած շանը նախականխելու համար կան բազմաթիվ ոչ, հա՞, ֆիզիկապես սպանելու օրինակներ, մեկը Մհերը Ձեզ բոլորիդ ցույց է տվել»,-ասված է Դատալեքսում հրապարակված բովանդակության մեջ։

Նարեկ Սամսոնյանի խոսքով, տեքստը կոնսպեկտել են ու մեջից հանել են «ինքնապաշտպանություն» բառերը։