Ձեր վստահելի աղբյուրը

«Մենք ունենք օրենսդրությամբ սահմանված մեխանիզմներ պետական կառավարման և տեղական ինքնակառավարման մակարդակում հանրային կյանքին և հանրային ֆինանսների կառավարման գործընթացին քաղաքացիների մասնակցության վերաբերյալ, սակայն բազմաթիվ փորձագետներ նշում են, որ այդ մասնակցության մակարդակը բավականին ցածր է»,-կառավարության նիստում հայտարարեց ֆինանսների նախարար Վահե Հովհաննիսյանը:

Նախարարը զեկուցեց Հայաստանի համայնքներում մասնակցային բյուջետավորմամբ ձևավորված ծրագրերի իրականացման նպատակով Հայաստանի Հանրապետության 2024 թվականի պետական բյուջեից համայնքներին սուբվենցիաների տրամադրման կարգը:

Նա հայտնեց, որ 4 համայնքում՝ Արագածոտնի մարզի Աշտարակ, Կոտայքի մարզի Աբովյան, Վայոց ձորի Ջերմուկ և Արմավիրի մարզի Արմավիր, ընթացիկ տարում բաց կառավարման գործընկերության նախագծի միջոցով արդեն իրականացվում են պիլոտային ծրագրեր:

Հովհաննիսյանի խոսքով, 2024 թվականի բյուջեով նախատեսվել է 500 մլն դրամ մասնակցային սկզբունքով սուբվենցիոն ծրագրերի համար:

«Նախագիծը սահմանում է, թե այդ համայնքների միջև ինչպես պետք է բաշխվի 500 մլն դրամը, և կանոնակարգում է մասնակցային բյուջետավորման գործընթացի հետ կապված հիմնական հարաբերությունները»,-հայտնեց նախարարը և բացատրեց, որ խոսքը գնում է համայնքի բնակիչների կողմից առաջարկ-նախագծերի ներկայացմանը, դրանց հրապարակմանը և հանրային քննարկմանը, նախագծերի վերաբերյալ քվեարկությանը, դրանց հիման վրա սուբվենցիոն ծրագրի մշակմանը, սուբվենցիոն հայտի կազմմանը, սուբվենցիայի հատկացման ընթացակարգերին և այլն:

Նախարարը տեղեկացրեց, որ նման ծրագրերում պետության համաֆինանսավորումը կարող է հասնել մինչև 80%:

Հաջորդ տարվա բյուջեով հատկացվող գումարը նախատեսված է Աշտարակ, Աբովյան, Ջերմուկ և Արմավիր համայքների համար:

Նախագծերի ընտրության ժամանակ համայնքի բնակիչների քվեարկության ընթցակարգը քննարկելիս Նիկոլ Փաշինյանը կատակեց, թե օբյեկտիվությունը պահպանելու համար կարելի է ԿԸՀ-ին ներգրավել գործընթացում: