Ձեր վստահելի աղբյուրը

«Ադրբեջանական զորքերը որտեղ կային, նույն տեղում էլ տեղակայված են, որևէ փոփոխություն չկա»,-խորհրդարանում տված ճեպազրույցում հայտարարեց Վայոց ձորի մարզպետ Արարատ Գրիգորյանը:

Նրա խոսքով՝ մի տարի է, ինչ սահմանային որևէ միջադեպ չի հիշում, կրակոցներ չեն եղել:

Հարցին, թե ադրբեջանական զինուժն ինչպես պետք է դուրս բերել Ջերմուկի տարածքից՝ Գրիգորյանն ասաց. «Ինչ եք ակնկալում, իմ կարծիքը՞, ասեմ՝ ոնց եկել են, այդպես էլ պետք է դուրս գան»:

Նա հնարավոր համարեց համաձայնագրով պայմանավորվելը և ադրբեջանցիների հետ գնալը, որ պատերազմելու խնդիր չլինի:

Մարզպետը հերքեց, որ մարզի Մարտիրոս գյուղի հարակից հատվածում ադրբեջանցիները դիրքային առաջխաղացում են ունեցել:

Գրիգորյանը հայտնեց, որ Վայոց Ձորում բնակիչների տեղաշարժ կա, բայց մարզից արտահոսք չկա:

«Տուրիստական ոլորտը լուրջ տուժել է, մենք բազմիցս հայտարարել ենք դրա մասին, այն վերականգնվում է, բայց շատ մեծածավալ, դժվար աշխատանք է իրականացվում: Կարևորը տեսնում ենք, որ այն արդյունքներ տալիս է»,-ասաց մարզպետը և հայտնեց, որ վերջին ագրեսիայիից հետո իրավիճակը դեպի դրականը գնում է, բայց 2022 թ սեպտեմբերից առաջվա իրավիճակի հետ համեմատած ոլորտը շատ լուրջ տուժել է:

Նրա խոսքով՝ որոշ տնտեսվարղներ աջակցության շնորհիվ իրենց ծախսերը փակել են և սկսել են եկամուտ ստանալ, բայց որոշները՝ ոչ: