Ձեր վստահելի աղբյուրը

«Իրականությունն այդպիսին չէ, թե հիմնականում տեղակայված են սահմանամերձ բնակավայրերում»,- ԱԺ-ում լրագրողների հետ զրույցում ասաց Գեղարքունիքի մարզպետ Կարեն Սարգսյանը՝ պատասխանելով հարցին, լուրեր կան, որ Արցախից բռնի տեղահանված անձանց մարզում տեղակայել են հիմնականում սահմանամերձ բնակավայրերում:

Նա նշեց, որ  մարզում բաշխվածության աշխարհագրությունն ամբողջությամբ ընդգրկվում է, մարզի բոլոր համայնքերում տեղակայված են  ԼՂ-ից բռնի տեղահանվածներ, ամենից շատ տեղակայվել են  Սևան խոշորացված համայնքում։ Նրա խոսքով, մարդիկ տեղակայված են հյուրանոցներում, հյուրատներում ու սեփական տներում:

«Ունենք նաև հյուրանոցներում տեղակայված մարդիկ, աշխատանքներ են տարվում, որպեսզի մեր հայրենակիցները վարձով տներ գտնեն ու տեղափոխվեն։ 

Տեղակայվել են նաև ԵԿՄ-ի ճամբարում, պայմանները տարբերվել են, բայց այնպիսի պայմաններ ենք ստեղծել իրենց համար, որ անհանգստություն չունենան», - ասաց Կարեն Սարգսյանը:

Նա նաև հայտնեց, որ մարզում իրավիճակը հանգիստ է, Ադրբեջանի կողմից կրակոցներ չեն արձանագրվում։

«Ադրբեջանական զինված ուժերը պետք է հետ գնան ու դուրս գան Հայաստանի Հանրապետության տարածքից»,- ասաց Գեղարքունիքի մարզպետը։