Ձեր վստահելի աղբյուրը

«Հայաստանի ուսուցիչների միություն» նախաձեռնության համակարգող Շողեր Բաբայանն օրեր առաջ առաջարկով էր հանդես եկել ուղղված կրթության ոլորտի բոլոր պատասխանատու վերադասներին՝  «9-րդ դասարանի մակարդակով 5-7 առարկաներին վերաբերվող մեկ թեստ են պատրաստ կազմել ու եթե այդքան վստահ են ուսուցիչների մասնագիտական գիտելիքների ռեֆորմի կայացմանը, ապա իրենք  գոնե 9-րդ դասարանի մակարդի թեստը պարտավոր են գրել և գոնե 100-ից 40-ի շեմը հաղթահարել»։

Panorama.am-ը հետաքրքրվեց Շողեր Բաբայանից՝ արդյո՞ք որևէ արձագանք ստացել են։

«Ոչ, բնականաբար, իրենք չեն արձագանքի։ Մենք այդ առաջարկը փոխանցել ենք Ազգային ժողովի Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Սիսակ Գաբրիելյանին, պատասխանեց՝ մենք ընտրությունների ժամանակ մեր ատեստացիան հանձնում ենք։ Իրենք իրենց համար ատեստացիա դա են համարում։ Եթե ձեր ատեստացիան այդքան հեշտ է, մի մարդու միջոցով կարողանում եք անցնել, ինչո՞ւ եք մնացածի համար այդքան բարդացնում»,- ասաց Բաբայանը։

Նա տեղեկացրեց, որ իրենք նամակ էին ուղարկել Նիկոլ Փաշինյանին։ Պատասխան են ստացել, որ իրենց նամակը կրթության, գիտության, մշակույթի և սպորտի նախարարություն է ուղարկվել։

«Սպասում ենք պատասխանի։ Ունենք նաև հետագայի համար մշակված քայլեր։ Բայց ամեն մեր նամակից հետո գոնե մի փոքր քայլ լինում է։ Հույս ունենք սա էլ... Չնայած կամավոր ատեստավորման թեմայով ամեն անգամ գրում ենք, մեր բոլոր նամակներում այս թեման կա։ Կարծում եմ՝  պետք է արդեն հասկանան, որ դա ամենակարևոր թեման է մեզ համար»,- ասաց Շ.Բաբայանը։

ԿԳՄՍՆ-ն ուսուցիչների կամավոր ատեստավորման կարգում որոշակի փոփոխություններ է առաջարկում։  Փոփոխությունների նախագիծը հանրային քննարկման փուլում է:

«Իրենց հիմնավորման մեջ գրել են, որ երեք տարվա փորձի արդյունքում վերլուծել են, տեսել, որ թեստերը բարդ են, աշխատատար են, գերլարում են պահանջում և այլն, որի արդյունքում իբր թե լավություն են անում ու շեմ իջեցնում։ Շեմ իջեցնելու իմաստը ո՞րն է։ Ուսուցիչը ժամանակ ծախսի, վերհիշի, վարժվի այլ թեմաներով, որոնք իր աշխատանքում  իրեն պետք չեն։ Իմաստը ո՞րն է, մարդուն զբաղեցնել մի բանով, որը  հետո չի կիրառելու իր գործում ու դրա համար չի վճարվելու»,- ասաց Շ. Բաբայանը։

Նա մի համեմատութուն արեց. «Եթե լրագրողների համար ատեստավորում լինի ու պարտադիր թեմաներից բացի նաև ճապոներենի իմացությունը ստուգեն։  Կարող է մարդ լինի, իմանա ճապոներեն, բայց դա պարտադիր չէ, որ իմանան բոլոր լրագրողները։ Նրանց գործում դա պետք չէ։ Կարող է մեկին պետք է եղել ու սովորել է ճապոներեն, նաև թարգմանություններ է անում։ Գնում է, ճապոներենի հարցերը լուծում է, բարձր միավոր է ստանում, քանի որ ինքը դրանով զբաղվել է այլ գործի մեջ, ոչ բուն իր աշխատանքի մեջ։ Մեր հետ լրիվ սա են անում։ Մեր բուն աշխատանքին վերաբերող հարցերն այնքան քիչ են, որ առավելագույնս կարողանաս 30-40 տոկոս հավաքես, մնացածը քո աշխատանքի հետ կապ չունի ու ասում են՝ պետք է իմանաք։  Ասում են՝ մաթեմատիկա պետք է իմանաք։ Լայն գիտություն է մաթեմատիկան, նույնիսկ գիտնականը մաթեմատիկայի բոլոր ճյուղերը չգիտի, դուք ի՞նչ իրավունք ունեք ինձանից այդ ամբողջը պահանջելու, եթե դա չեմ կիրառում իմ գործում։ Ինչն օգտագործում եմ, դա ստուգի բարձր մակարդակով»։