Ձեր վստահելի աղբյուրը

Վրաստանի եվրոպացի գործընկերները հարցեր չունեն՝ կապված նախկին նախագահ Միխեիլ Սաակաշվիլու բանտարկության հետ՝ երկրին ԵՄ անդամակցության թեկնածուի կարգավիճակ տալու որոշումն ընդունելուց առաջ։ ՏԱՍՍ-ը հայտնում է, որ այդ մասին հայտարարել է Վրաստանի խորհրդարանի նախագահ Շալվա Պապուաշվիլին։

Ավելի վաղ Լեհաստանի արտգործնախարար Զբիգնև Ռաուն ասել էր, որ Վրաստանը զգալի առաջընթաց է գրանցել դեպի ԵՄ ճանապարհին, սակայն Վարշավան որոշակի ակնկալիքներ ունի որոշ քաղաքական հարցերի վերաբերյալ, ինչպիսիք են Սաակաշվիլիի հետագա ճակատագիրը և նրա առողջական վիճակը։

«Միխեիլ Սաակաշվիլիի հարցը վաղուց լուծվել է, իսկ այն բանից հետո, երբ ՄԻԵԴ-ը վճիռ կայացրեց, որ տեղում նրա բուժման անհնարինության մասին տեղեկատվությունը սուտ է՝ թերահավատների համար էլ ամեն ինչ  պարզ  դարձավ: Այս մասին պարզ դարձավ մայիս ամսից և նրանք, ովքեր հերքում են դա, հերքում են իրականությունը: Մենք հանդիպումներ ենք ունեցել, և անձամբ ես այցերի ժամանակ ճշտել եմ, որ ոչ ոք որևէ հարց չունի այս գործի հետ կապված»,- լրագրողներին ասել է Պապուաշվիլին՝ մեկնաբանելով Ռաուի հայտարարությունը:

«Ինչ վերաբերում է Վրաստանին թեկնածուի կարգավիճակ ստանալուն աջակցելուն, ես վստահ եմ, որ բոլոր այն երկրներն ու քաղաքական խմբերը, որոնք աջակցում են Վրաստանին, կաջակցեն մեզ թեկնածուի կարգավիճակ շնորհելուն: Նրանք, ովքեր դեմ են այդ կարգավիճակին, կարող են լինել միայն ոչ թե Վրաստանի բարեկամները, այլ՝ Միխեիլ Սաակաշվիլու»,-հավելել է նա։