Ձեր վստահելի աղբյուրը

Ազգային ժողովի մշտական հանձնաժողովների համատեղ նիստում   «ՀՀ 2024 թվականի պետական բյուջեի մասին» ՀՀ օրենքի նախագծի նախնական քննարկումներին ԿԳՄՍ նախարար Ժաննա Անդրեասյանը խոսելով 2-րդ, 5-րդ և 7-րդ  դասարանների նոր տպագրված դասագրքերի մասին, ասաց, որ գործընթացն իրականացվում է առաջին անգամ և բարելավումների կարիք ունի։

«Ներդրված նոր կարգի նպատակն է  դասագրքի ստեղծումն  առանձնացնել տպագրությունից, շուկան բացել, որպեսզի տպարանները կարողանան մասնակցել, մարդիկ էլ, ովքեր ուզում են ուղղակի դասագիրք գրել, ունենալ այդ հնարավորությունը։

Առաջին անգամ այս գործընթացն իրականացնելով այս ձևով՝ ունենք այս արդյունքները։  Վստահ եմ՝ երկրորդ տարում, երբ  կբարելավենք նկատված թերությունները, մեր արդյունքները միայն   ավելի լավն են լինելու»,- ասաց նախարարը։

Նա հարցադրում արեց՝ ինչո՞ւ են դժվարություններ առաջացել։ Ըստ նախարարի մեկնաբանության, բացի մեխանիզմի փոփոխությունից, այն զուգահեռվեց բովանդակության  փոփոխությամբ, նաև նոր չափորոշչին համաձայն նոր դասագիրք պետք է մշակեին։

«Մի իրավիճակում էինք, որ  տասնյակ տարիներ  մեզ մոտ ոչ ոք նոր դասագիրք չէր գրել։ Ակնհայտ է,  որպեսզի գրվի որակյալ նոր դասագիրք,  պետք է լինի նախապատրաստական լուրջ աշխատանք, միանգամից  ստանալ բոլորիս բավարարող որակ, ուտոպիստական  ակնկալիք կարող էր լինել։

Մենք ունենք առնվազն այն որակը, որի վրա կարող ենք աշխատել։ Տեսնում ենք այն բարելավումների տեղերը, որոնք կան բովանդակության մասով։ Ասել ենք, որ  այս տարին  լինելու է  դասագրքերի փորձարկման տարի, դրանք պետք է լինեն դպրոցներում, օգտվեն, տեսնենք՝ ինչը փոխելու կարիք կա։ Երկրորդ կիսամյակում կանենք անհրաժեշտ բովանդակային ու տեխնիկական  լրամշակումները, փոփոխությունները»,- ասաց Ժաննա Անդրեասյանը։

Լրագրողերի հետ զրույցում նա ասաց, որ շատ ուշադիր են բոլոր կարծիքների, դիտարկումների նկատմամբ, որտեղ կա ռացիոնալ առաջարկ, մոտեցում, մանրամասն կդիտարկվեն դրանք։

«Մենք պետք է հստակ տարբերականք՝ բոլոր նոր դասագրքերի բովանդակային, տեխնիկական վերանայումների պահանջը, որը հստակ ու մասնագիտորեն կձևակերպվի ու պետք է տարբերակենք այն թիրախավորված  արշավը, որ կա։ Այս երկուսը եթե խառնում ենք իրար, ոչ մի լավ բան չի ստացվում։ Նախարարությունը դա չի խառնում իրար»,- ասաց Ժ. Անդրեասյանը։

Այնուհետև նշեց. «Հանրությանը երբևէ հետաքրքրե՞լ է, թե մեր երեխաները ինչ դասագրքերով են տարիներ շարունակ դպրոցներում սովորել։ 2019 թվականին գործող դասագրքերի ուսումնասիրություն է  եղել, միայն մի դասագրքից մի քանի հարյուր բովանդակային ու փաստական անճշտություն է  դուրս բերվել։ Ինչի՞ մասին է  խոսքը։ Խոսքն այն մասին է, որ մեզանում  որակյալ դասագիրք գրքելու պրոբլեմ կա, չկա  ձևավորված ավանդույթը։ Ինչպե՞ս վարվել  այդ իրավիճակում. այդ ավանդույթը չձևավորե՞լ, թե գնալ մի ճանապարհով, որով մենք շանս ենք ստանում ունենալ նոր ու որակյալ դասագրքեր, որից բոլորը բավարարված կլինի։ Գնում ենք այդ ճանապարով։  Չես կարող սկսել մի աշխատանք ու ունենալ 100 տոկոսանոց արդյունք, հատկապես  կրթության ոլորտում։ Ունեցեք այդ համբերությունը»։