Ձեր վստահելի աղբյուրը

«Որքան դուք ավելի շատ եք խոսում սուվերենությունից և ինքնիշխանությունից, այնքան մենք սուվերենության և ինքնիշխանության կորուստ ենք ունենում»,-խորհրդարնում Արարատ Միրզոյանին դիմեց «Հայաստան» խմբակցության պատգամավոր Քրիստինե Վարդանյանը և բերեց օրինակը, երբ Երևանում «Նեմեսիսի» արձան է տեղադրվում, որից հետո Թուրքիայից լինում է արձագանք և ՀՀ ամենաբարձրաստիճան պաշտոնյաները հերթով սկսում են քննադատել արձանի տեղադրումը՝ ասելով, որ դրա հետ կապ չեն ունեցել:

Նա հայտնեց, որ Հայաստանի անվտանգության ապահովման հարցում ամենամեծ խնդիրը պետական մակարդակով հնչեցվող թեզերն են և խնդրեց անդրադառնալ դրանցից երկուսին, որը քարոզում է Արարատ Միրզոյանը և իր ներկայցրած ՔՊ-ն:

Ընդդիմադիր պատգամավորը հայտարարեց, թե պետական մակարդակով ջանք չի խնայում քարոզելու, որ Հայաստանի և Ադրբեջանի միջև  հիմնական հարցը Արցախի հարցն էր և նրա օկուպացիայով դրանք վերացել են և հնարավորություն է ստեղծվել հարաբերությունները կարգավորել և պայմանագիր կնքել:

«Խնդրում եմ պարզաբանեք՝ 2023 նոյեմբերի 3-ի դրությամբ ՀՀ տարածքից  քանի ք/կմ տարածք է օկուպացված Ադրբաջանի կողմից»,-հարցրեց Վարդանյանը:

Անդրդառնալով իշխող ուժի կողմից քարոզվող երկրորդ հիմնական թեզին՝ պատգամավորն ասաց. «Կառավարությունը ջանք չի խնայում համոզելու, որ եվրախորհրդարանում ծափողջյուններով կամ տարբեր պաշտոնյաների թվիթներով ու հայտարարություններով ապահովել անվտանգությունը: Դուք բառացիորեն որդեգրել եք անվտանգության ապահովման ծափողջյունային դոկտրինը, այս առումով աշխարհում առաջինն եք»,- հայտարարեց ընդդիմադիր պատգամավորը և հարցրեց, թե իշխանության հինգ տարիների ընթացքում, որ երկրի հետ է պայմանավորվածություններ ձեռքբերվել Հայաստանի անվտանգության և բացակայող բաղադրիչների լրացման ուղղությամբ:

Նա հետաքրքրվեց, թե ինչն է կաշկանդում ՀՀ կառավարությունը, որը որևէ արձագանք չի ցուցաբերում Իրանից հնչող անվտագության ոլորտի համագործակցության առաջարկներին և դրանք այդպես էլ իրականություն չեն դառնում:

Քրիստինե Վարդանյանը նաև հայտարարեց, որ երբ մասնավոր ընկերությունները կարողանում են զենք ձեռք բերել, պետությունը հայտարարում է թե գումարը տվել է բայց զենք չեն տալիս:

«Հայաստանը կարողանում է զենք ձեռք բերել անհամեմատ ավելի շատ  ու անհամեմատ ավելի շատ երկրներից, քան ձեր քաղաքական կուսակցությունը կհանդգներ կամ կերազեր ամենապայծառ երազում»,-պատասխանեց  Արարատ Միրզոյանը և հավելեց. «Տիկին Վարդանյան, դժվար է Ձեզ արձագանքել և մնալ այն սահմաններում, որը կուզեի, բայց կփորձեմ: Ձեր խոսքից ես երկու տեսական տպավորություն կարող եմ ունենալ, առաջին՝ ձեր ատելության ծավալն դեպի իշխանություններ այնքան մեծ է, որ դուք չեք տեսնում որոշ իրողություններ:Սա լավատեսական մեկնաբանությունն է: Երկրորդ մեկնաբանությունն ավելի վատն է՝ այն նշանակում է, որ դուք տեսնում, հասկանում եք, բայց ուղղորդված կերպով փորձում եք ներկայացնել այն լույսի ներքո, որը ներկայցնում եք»: